ჯანდაცვის მინისტრის, ეკატერინე ტიკარაძის განცხადებით, დღეს ზარების 40%-იანი ჩამორჩენაა, თუმცა ცხელ ხაზზე უახლოეს მომავალში ოპერატორები დაემატებიან. ამის შესახებ მან საკოორდინაციო სხდომის დასრულების შემდეგ განაცხადა.

იგი ასევე განმარტავს, რატომ არის ცხელ ხაზზე შეფერხებები.

„მინდა, საზოგადოებამ იცოდეს, რატომ იყო შეფერხებები 112-ზე შემოსულ ზარებთან დაკავშირებით, რომელიც არა მხოლოდ „კოვიდის“ პერიოდში, არამედ სხვა დროსაც არაერთხელ ყოფილა ნახსენები.

სასწრაფო დახმარების ჯგუფმა ბინიდან კლინიკებში 226 მოქალაქე გადაიყვანეს, საკარანტინო ზონიდან  19, ასევე ბინიდან საკარანტინო სივრცეში გადაყვანაც მათი მოვალეობაა. ვინაიდან,  კლინიკიდან საკარანტინო სივრცეში 26 პაციენტი გადაიყვანეს. ასევე, ბინიდან საკარანტინო სივრცეში 78 პაციენტი იქნა გადაყვანილი.

აღსანიშნავია, რომ იმ ახალი მოდელით, როდესაც კოვიდსასტუმროებში გადასაყვანად შედარებით მსუბუქი პაციენტებისთვის ექიმების ჯგუფი გვყავს მობილიზებული, როდესაც პაციენტს კლინიკის სივრცეში დაყოვნება არ ესაჭიროება, ჩვენ ისინი სასტუმროებში გადაგვყავს. 24 საათის განმავლობაში 82 პაციენტი გადავიყვანეთ კლინიკიდან საკარანტინო სივრცეში. ასევე, მნიშვნელოვანია, რომ მივიღეთ 318 ცხელებიანი პაციენტი, მათგან კოვიდკლინიკაში 25 მკურნალობს. აღნიშნული რიცხვები დაახლოებით ათასამდეა. მინდა, დაგარწმუნოთ, რომ ყველანაირად ვცდილობთ, პაციენტებს მინიმალური დაყოვნება ჰქონდეთ. რა თქმა უნდა, ვაკვირდებით იმასაც, რომელ პაციენტს ესაჭიროება მეტად მყისიერი რეაგირება, რათა არ გვქონდეს გართულებები, ყველანაირად ვცდილობთ, ჩვენვე მოვახდინოთ იდენტიფიცირება“, – განაცხადა ეკატერინე ტიკარაძემ.