აშშ-ის პრეზიდენტმა დონალდ ტრამპმა დაასახელა თარიღი, რა დროიდანაც მთელი ქვეყნის მასშტაბით TikTok-ის აპლიკაცია აიკრძალება.
„ჩვენ დავადგინეთ თარიღი – სავარაუდოდ 15 სექტემბერი. ამ დროისთვის ის აშშ-ში მუშაობას შეაჩერებს. თუმცა, თუ Microsoft-ი, ან რომელიმე სხვა იყიდის მას, ეს უკვე საინტერესო იქნება“ – აცხადებს ამერიკელი ლიდერი.
მან იქვე განმარტა, რომ როცა ამ საკითხს Microsoft-თან განიხილავდა, მას მთელი კომპანიის ყიდვა შესთავაზა და არამხოლოდ რამე წილის. ტრამპი მიიჩნევს, რომ თუ გარიგება შედგება, აშშ-ის მოქალაქეების მონაცემები, რომლებიც ამ აპლიკაციას მოიხმარენ, დარჩება ქვეყნის ფარგლებში და არ გაჟონავს მის გარეთ.
Microsoft-ის გეგმის შესახებ, რომ შეიძინოს TikTok-ი, 31 ივლისს გახდა ცნობილი. არაოფიციალური ინფორმაციით, ტრამპი აპირებს აიძულოს ByteDance-ი, უარი თქვას წილზე, რათა ჩინეთმა ვეღარ შეძლოს აშშ-ში სოციალური ქსელის კონტროლი.
