„წადი არჩევნებზე და მოიგე ტესლა!“ – მათთვის, ვინც საპარლამენტო არჩევნებში მონაწილეობას მიიღებს, პოლიტიკური პარტია „გირჩი“ „ტესლას” ავტომობილებს გაათამაშებს. განცხადება ამის შესახებ, პოლიტიკური პარტიის ლიდერმა, ზურაბ ჯაფარიძემ კაჭრეთის „ამბასადორში“ გააკეთა.
ზურაბ ჯაფარიძემ მედიის წარმომადგენლებს, გათამაშებაში მონაწილეობის პირობები გააცნო და განაცხადა, რომ პარტია ავტომობილებს, სახელმწიფოს მიერ პარტიის დაფინანსებისათვის ჩარიცხული თანხით შეიძენს.
„გირჩი არ აპირებს რომ გადასახადის გადამხდელებისგან აიღოს ფული. ბევრი ვიფიქრეთ, რა გვექნა ამ ფულისთვის და გადავწყვიტეთ, ის გამოგვეყენებინა არჩევნებზე მოქალაქეების მისვლის მოტივაციის გასაზრდელად. პარტიისთვის განკუთვნილი საბიუჯეტო ფულით შევიძენთ ავტომობილ „ტესლა“, რომელსაც გავათამაშებთ. რაც მეტ ხმას მიიღებს გირჩი, მით მეტი იქნება საბიუჯეტო დაფინანსება და მით მეტი ტესლა გათამაშდება“,- განაცხადა ჯაფარიძემ.
გათამაშებაში მონაწილეობას შეძლებს ყველა მოქალაქე, რომელიც ცესკოს ერთიან სიაშია რეგისტრირებული და 31 ოქტომბერს მისთვის სასურველ პარტიას მისცემს ხმას. ხმის მიცემის შემდეგ, მონაწილეობის მიღების დასადასტურებლად, მოქალაქემ უნდა გადაიღოს სელფი, საარჩევნო უბანთან და პირად ფბ გვერდზე ატვირთოს.
დღეიდან პარტიას, ოფიციალური ვებ-გვერდი და საკუთარი გაზეთი, სახელწოდებით „თავისუფლება“ ექნება.
ავტორი: ხათუნა გულიაშვილი
