წელს პირველად, ეტლით მოსარგებლეებს საარჩევნო უბანზე მისვლის საშუალება ექნებათ. როგორც ცესკოში განმარტავენ, ეტლით მოსარგებლეს სასურველი ოლქის შერჩვა საარჩევნო რუკაზე შეეძლებათ.
„ცესკოს ინიციატივით საარჩევნო ადმინისტრაციის ვებგვერდზე განახლდა ბანერი, საარჩევნო რუკა, სადაც ეტლით მოსარგებლეს შეუძლია მიიღოს ინფორმაცია კონკრეტული საარჩევნო ოლქის სამოქმედო ტერიტორიაზე არსებული ადაპტირებული საარჩევნო უბნების შესახებ და სურვილის შემთხვევაში თავად აარჩიოს, რომელ ოლქში სურს მიიღოს მონაწილეობა. ცესკოს ვებგვერდზე, პანდუსის მქონე უბნების შესახებ ინფორმაცია ხელმისაწვდომია 1118 საარჩევნო უბნისათვის.
ეტლით მოსარგებლე ამომრჩევლების კონსტიტუციური უფლების ხელშეწყობის მიზნით, ცესკოში შექმნილმა შეზღუდული შესაძლებლობების საკითხზე მომუშავე ჯგუფმა მოამზადა საკანონმდებლო ცვლილებების პროექტი.
ცვლილებების მიხედვით, ეტლით მოსარგებლე ამომრჩეველი უფლებამოსილია არჩევნებში მონაწილეობა მიიღოს შესაბამისი ოლქის ტერიტორიაზე არსებულ ნებისმიერ ადაპტირებულ საარჩევნო უბანზე, რისთვისაც მან კენჭისყრის დღემდე არაუგვიანეს მეექვსე დღისა (რაც არის 25 ოქტომბერი) უნდა მიმართოს შესაბამის საოლქო ან საუბნო საარჩევნო კომისიას ზეპირი ან წერილობითი განცხადებით. ამომრჩეველი, რომელიც მოითხოვს ხმის მიცემას, შეიყვანება უბნის სპეციალურ სიაში.
ვინაიდან წელს პირველად, საპარლამენტო არჩევნებზე იქნება შესაძლებელი აღნიშნული უფლების გამოყენება, ცესკო მიმართავს ეტლით მოსარგებლე პირებს, ისარგებლონ საარჩევნო რუკით, შეარჩიონ ყველაზე ხელსაყრელი უბანი და ინფორმაცია დროულად მიაწოდონ კომისიას“,- განამრტავენ ცესკოში.
წელს ქვეყანაში საპარლამენტო არჩევნები 31 ოქტომბერს ჩატარდება.
