ცენტრალურმა საარჩევნო კომისიამ შეიმუშავა გეგმა, როგორ მოემსახურებიან არჩევნებზე ადამიანებს, რომლებიც კორონავირუსის პანდემიის გამო სტაციონარში, კარანტინში ან თვითიზოლაციაში არიან.
როგორც ცესკოში განმარტავენ, შეიქმნა სპეციალური ჯგუფი, რომლებიც გადასატანი ყუთების მიტანას უზრუნველყოფს ამომრჩევლებთან.
„საარჩევნო ადმინისტრაცია ამომრჩევლებს სთავაზობს არჩევნებში მიიღონ მონაწილეობა საარჩევნო კომისიის ფუნქციების მქონე სპეციალური ჯგუფების მომსახურებით. კერძოდ, ცესკო მუნიციპალიტეტებში საოლქო საარჩევნო კომისიების მოქმედების საზღვრებში შექმნის არანაკლებ ერთ საარჩევნო უბანს და დააკომპლექტებს სპეციალურ ჯგუფებს.
სპეციალური ჯგუფის წარმომადგენლები უზრუნველყოფენ სტაციონალურ სამკურნალო დაწესებულებებსა და კარანტინში მყოფ მოქალაქეებთან საარჩევნო ყუთის მიტანას. ამასთან, თვითიზოლაციაში მყოფ ამომრჩევლებს, რომელთა მონაცემებიც ოფიციალურად ფიქსირდება მონაცემთა ბაზაში, ექნებათ შესაძლებლობა საარჩევნო ადმინისტრაციას მიმართონ გადასატანი საარჩევნო ყუთის მომსახურებით.
სპეციალური ჯგუფის ყველა წევრი იქნება აღჭურვილი საჭირო ეკიპირებით, სრულად იქნება დაცული ეპიდემიოლოგების რეკომენდაციები. აღსანიშნავია, რომ სპეციალურ უბნებსა და მის წევრებს არ ექნებათ შეხება ჩვეულებრივ საარჩევნო უბნებთან, რაც უზრუნველყოფს პროცესის დაცულობას, მეტ უსაფრთხოებას და ჩართული მხარეებისთვის მონაწილეობის შესაძლებლობას.
ხმების დათვლა განხორციელდება არასაკარანტინო სივრცეებსა და სამედიცინო დაწესებულებებში, არამედ ცალკე, სპეციალურად შექმნილ საარჩევნო უბნებში, რაც ხელს შეუწყობს პროცესის მეტ გამჭვირვალობას.
ამასთან, შესაბამისი წესების დაცვით, დამკვირვებლებს, მედიას და საარჩევნო სუბიექტების წარმომადგენლებს ექნებათ საშუალება გაყვნენ გადასატან ყუთს და დააკვირდნენ ხმების დათვლის პროცესს“,- განაცხადეს ცესკოში.
ცნობისთვის, საქართველოში საპარლამენტო არჩევნები 31 ოქტომბერს ჩატარდება.
