პარტია „ლელო-საქართველოსთვის“ წევრებს საქართველოს ყოფილ პრემიერ-მინისტრთან, გიორგი კვირიკაშვილთან პოლიტიკური თანამშრომლობის სურვილი აქვთ.
როგორც „პრაიმტაიმთან“ „ლელო-საქართველოსთვის“ ერთ-ერთმა წევრმა კახა კოჟორიძემ განაცხადა, მიუხედავად მათი სურვილისა, კვირიკაშვილი პოლიტიკაში დაბრუნებას არ აპირებს.
„მამუკა ხაზარაძეს ჰქონდა შეხვედრა 2 თუ 3 თვის წინ ყოფილ პრემიერთან. ამ შეხვედრაზე გიორგი კვირიკაშვილმა განაცხადა, რომ პოლიტიკაში მობრუნებას არ აპირებს.
გუშინ მამუკა ხაზარაძემაც აღნიშნა, რომ უახლოესი პერიოდიდან გიორგი კვირიკაშვილი ყველა პრემიერს სჯობდა, ამ შეფასებას მეც ვიზიარებ“, – განაცხადა კოჟორიძემ.
კითხვაზე, შესთავზა თუ არა ხაზარაძემ კვირიკაშვილს პოლიტიკაში დაბრუნება და “ლელოში” გაწევრიანება? კოჟორიძე გვპასუხობს, რომ ამ კითხებზე პასუხს ვერ გაგვცემს.
„იყო თუ არა შეხვედრის მიზანი ამ საკითების განხილვა, ამას ვერ გეტყვით. შეხვედრის მიზანი იყო აზრთა გაცვლა-გამოცვლა. საქართველოს ყოფილი პრემიერ-მინისტრის მოსაზრებები ქვეყანაში მიმდინარე პოლიტიკურ ცხოვრებაზე, რა თქმა უნდა, ძალიან საინტერესოა“,- განაცხადა კოჟორიძემ.
რაც შეეხება „ლელოში“ საქართველოს ყოფილი პრეზიდენტის გიორგი მარგველაშვილის შესაძლო გაწევრიანების საკითხს, როგორც კოჟორიძემ განაცხადა, ამ საკითხთან დაკავშირებით, ჯერ გადაწყვეტილება მიღებული არ არის.
„მამუკა ხაზარაძე გიორგი მარგველაშვილს შეხვდა. შეხვედრა შეეხებოდა აზრთა გაცვლა-გამოცვლას – იმას, რომ იდეური თანხვედრაა საქართველოს მეოთხე პრეზიდენტსა და პარტია „ლელოს“ შორის არის.
ხელისუფლება არის აუცილებად შესაცვლელი, მთელი რეფორმები არის გასატარებელი ეკონომიკის, მართლმსაჯულების, ადამიანის უფლებების მიმართულებით. დანარჩენი დეტალები საჯაროდ არ თქმულა და არც რაიმე გადაწვეტილება არის მიღებული“,- განაცხადა კოჟორიძემ.
გავრცელებული ინფორმაციის თანახმად, საქართველოს ყოფილი პრეზიდენტი გიორგი მარგველაშვილი, შესაძლოა, „ლელო-საქართველოსთვის“ სიის პირველი ნომერი იყოს.
ასევე დაგაინტერესებთ:
- დგება მომენტი, როცა რაღაც უნდა შეიცვალოს – გიორგი კვირიკაშვილი პოლიტიკაში ბრუნდება?!
- მას აქვს ავტორიტეტი, როგორც ქვეყნის შიგნით, ისე გარეთ – ხუხაშვილი კვირიკაშვილზე
ავტორი: ეკატერინე ზარნაძე
