ტელევიზიები გამოთქვამდნენ ვარაუდებს და აღარ დასვათ ეს კითხვები – პარლამენტი, სამინისტრო, ყველანაირი შეთქმულების თეორია, თუ გნებავთ ბელარუსიც გამორიცხეთ, – ამის შესახებ საქართველოს პირველი არხის უკვე ყოფილი დირექტორი, ვასილ მაღლაფერიძე აცხადებს.

„ჩემი პროფესიის დიდი ნაწილი იყო მასწავლებლობა. „ტელესკოლაში“ მაქვს ორი პროექტი – არის საგანმანათლებლო პროექტები, ამასაც გავაკეთებ იანვრამდე, იანვრის მერე შევხედოთ, როგორ იქნება“ ,- აღნიშნა ვასილ მაღლაფერიძემ.

რაც შეეხება საქართველოს პირველ არხში აუდიტის სამსახურის შესვლას, ვასილ მაღლაფერიძე პასუხობს:

„ახლა არ შემოსულა არანაირი აუდიტი, თუმცა აუდიტის დასკვნა არის, მათ შორის იმ ადამიანებზე, რომლებიც ადრე იყვნენ აქ და ახლა სხვადასხვა მედიასაშუალებებში მუშაობენ. თუ კარგად შეისწავლით, სწორედ მათთან არის კითხვები. სხვათა შორის თქვენთანაც არიან ასეთი ადამიანები“.

კითხვაზე, რომ აუდიტის სამსახურის შესახებ საქართველოს პირველი არხის პროფკავშირების თავმჯდომარემ ისაუბრა, ვასილ მაღლაფერიძე ამბობს, რომ ეს უპასუხისმგებლო საუბარია.

„ამაზე ვინც საუბრობს, ჩვეულებრივად აგრძელებს უპასუხისმგებლო საუბარს. სამწუხაროდ, ჩვენთანაც დამკვიდრდა, რომ ადამიანებმა არ იციან, რას ლაპარაკობენ. მაინც საუბრობენ ამ სისულელეს, ოღონდ დამაჯერებელი სახით. აუდიტის დასკვნა არსებობს, პროკურატურაშიც გადაგზავნილია და შეგიძლიათ, გამოიტანოთ, ეს ღიაა და დაინახავთ, ვის მიმართ არის კითხვები. რაც შეეხება სესხს, პროფკავშირების თავმჯდომარე ჩემამდე მუშაობდა აქ და უყურებდა ამ დაქცეულ ვითარებას. ვითარება დაქცეული იყო იმიტომაც, რომ ამ ტელევიზიის რესურსები პირდაპირ ხმარდებოდა სხვა ტელევიზიებს დანაშაულებრივად, თუნდაც იმავე „რუსთავი 2“-ს. ძალიან ცუდია, რომ ეს არ იცის პროფკავშირების თავმჯდომარემ. ამიტომ იყო 45 მილიონის სესხი საჭირო, რომ ამ არხზე მომხდარიყო ტექნიკური გადაიარაღება. გონიერ ადამიანს ამაზე კითხვა არ უნდა გაუჩნდეს“, – განაცხადა ვასილ მაღლაფერიძემ.