იმდენად იშვიათ შემთხვევასთან გვაქვს საქმე, რომ ყველას გამოკვლევა არარეალისტურია, – ამის შესახებ “პირველებისთვის” მიცემულ კომენტარში ინფექციონისტმა მაია ბუწაშვილმა ახალციხის შემთხვევასთან დაკავშირებით განაცხადა.
“ასეთი ალგორითმი და რეკომენდაცია არცერთ ქვეყანაში არ არის, რომ ვაქცინამდე აუცილებელია რომელიმე გამოკვლევის ჩატარება. შესაბამისად, გამოკვლევები არ ტარდება.
რაც შეეხება ამ მოვლენას, როგორც ჩანს, უკიდურესად იშვიათ მოვლენასთან გვაქვს საქმე, ეს არის ძალიან იშვიათად. ე.წ. ანაფილაქსიური რეაქცია ჰქვია, ანუ ალერგიული რეაქცია. მისი მართვა ასე თუ ისე კარგად იციან ჩვენმა ექიმებმა, დატრენინგდნენ და იმედია, რომ კარგად დამთავრდება. მე არ ვიცი დეტალები, რა მოხდა იქ. ასევე შესაძლებელია იყოს გულყრა. თეორიულად შესაძლებელია ემოციურ ფონზეც განვითარდეს მსგავსი შემთხვევა.
იმდენად იშვიათია ასეთი გვერდითი მოვლენა, რომ ამის გამო ყველა ასაცრელი ადამიანის გამოკვლევა რეალურად არარეალისტურია და ეს არსად არ ტარდება”, – განაცხადა მაია ბუწაშვილმა.
ახალციხეში კოვიდზე აცრილ ექთანს მძიმე გვერდითი რეაქცია განუვითარდა.
საქართველოში კორონავირუსის საწინააღმდეგო ვაქცინაცია 2021 წლის 15 მარტიდან დაიწყო.
