“ნაციონალური მოძრაობის” წევრის, რომან გოცირიძის განცხადებით, 5-6 ივლისს “პრაიდთან” დაკავშირებით, განვითარებულ მოვლენების გამო, “პრემიერ-მინისტრი და მთავრობა უნდა გადადგეს”.

„ვხედავთ, რომ ასობით ველური მოძალადე არის იდენტიფიცირებული, ყველა გაუშვეს, ალბათ 2-3 ადამიანს ჩატოვებენ საჩვენებლად, შემდეგ რაღაცას გაუფორმებენ და ამით დასრულდება. შედეგით – დაისჯება თუ არა ეს ხალხი, იქნება განსაზღვრული, რა როლი მიუძღოდა ხელისუფლებას. ხელისუფლება რომ არის დამნაშავე და წამქეზებელი, ამაში ორი აზრი არ არის. ამიტომ დაუყოვნებლივ უნდა გადადგეს პრემიერ-მინისტრი, მიყვეს მთავრობა და შინაგან საქმეთა მინისტრი. ეს ადამიანები არიან დამნაშავეები.

მათ გაწირეს პატიოსანი, რიგითი პოლიციელები. რაგბის ილეთებით, ხელჩაკიდებულები უტევნდნენ+ პოლიციელებს, ანგრევდნენ კედელს და პოლიციის ხელმძღვანელობა ჩახუტებული საუბრობდა ქუჩაში მოძალადეების ლიდერებთან და მათთან ფილოსოფიურ განსჯებში იყო, ნაცვლად იმისა, რომ მოეკიდა ყურში ხელი და კინწისკვრით გაეყარათ”,- განაცხადა გოცირიძემ.

შეგახსენებთ, 5 ივლისს ძალადობრივი ჯგუფის წარმომადგენლებმა, რომლებიც “ღირსების მარშის” გამართვას ეწინააღმდეგებოდნენ,  მედიის წარმომადგენლები სცემეს და შეურაცხყოფა მიაყენეს. ძალადობრივი ჯგუფი თავს ესხმოდა სხვა მშვიდობიან მოქალაქეებსაც. დაპირისპირება მოხდა 6 ივლისსაც.