ხელი ნუ წაგიცდებათ და ნუ გადახვალთ ისევ ტყუილებზე. უნდა გაემზადოთ ოპოზიციაში გადასვლისთვის, – ასე გამოეხმაურა „ახალი საქართველოს“ ლიდერი, გიორგი ვაშაძე საკონსტიტუციო ცვლილებების მესამე მოსმენით მიღებას.

მისივე თქმით, საკონსტიტუციო ცვლილებების დამტკიცება დიდი ძალისხმევის შედეგია

„ეს გამარჯვება მოგვიტანა სამმა მნიშვნელოვანმა ფაქტორმა. პირველი, ეს საზოგადოებრივი აზრის ერთიანობა და წნეხია„ქართულ ოცნებაზე“, მეორე ეს არის ოპოზიციის ერთიანობა, ფრონტი, რომელიც ჩვენ გავხსენით და მესამე, ჩვენი საერთაშორისო საზოგადოების დიდი მხარდაჭერა ქართული დემოკრატიიისთვის, რომელთაც დაინახეს, რომ 14 ნოემბერს ის დიდი ტყუილი, რომელიც ივანიშვილმა და ქართულმა ხელისუფლებამ აკადრა საქართველოს მოსახლეობას, არ უნდა გასულიყო იმიტომ, რომ მნიშვნელოვანი იყო, საქართველოს დემოკრატიული განვითარება გაეგრძელებინა. ამ შეთანხმებას კიდევ ერთი საკითხი აქვს შესასრულებელი. გიორგი რურუას გათავისუფლება. ბევრს, შესაძლოა, მოგწონთ ან არ მოგწონთ ეს პიროვნება, მაგრამ, მთავარია, რომ საქართველო არჩევნებს უნდა შეხვდეს ყველა პოლიტპატიმრის გარეშე, ამიტომ ჩვენი პოზიცია უნდა იყოს ურყევი და ერთიანი, რათა ეს ყველაფერი მივიყვანოთ ბოლომდე.

მინდა თითოეულ მოქალაქეს ვუთხრა, რომ ეს საკონსტიტუციო ცვლილებები არ ნიშნავს, რომ უნდა მოვეშვათ, ჩვენ 31 ოქტომბერს თქვენთან ერთად ძალიან დიდი გამარჯვება უნდა მოვიპოვოთ, დავამარცხოთ ის უბედური კლანი, რომელიც აზის საქართველოს, რომელიც გვაღარიბებს თითოეულ ჩვენგანს.

მე ვაფრთხილებ „ქართულ ოცნებას“, ძალიან კარგად იცით საერთაშორისო საზოგადოების განწყობა, კარგად იცით, რომ ოპოზიცია ერთიანია ამაში და იცით საქართველოს მოსახლეობის განწყობა, ხელი ნუ წაგიცდებათ და ნუ გადახვალთ ისევ ტყუილებზე,“ – განაცხადა გიორგი ვაშაძემ.

დღეს საკანონმდებლო ორგანოში საკონსტიტუციო ცვლილებები მესამე მოსმენით დაამტკიცეს. კენჭისყრას „ნაციონალური მოძრაობა“ და „ევროპული საქართველო“ არ ესწრებოდნენ.