რეგიონებთან დაკავშირებით არაერთხელ გვითქვამს, რომ გამარჯვებისთვის აუცილებელია რეგიონებში საკუთარი კანდიდატების დაყენება, ეს პრინციპი არ შეიცვლება, – ამის შესახებ ფრაქცია „ნაციონალური მოძრაობის” თავმჯდომარემ, რომან გოცირიძემ განაცხადა.
მისი თქმით, „ნაციონალურ მოძრაობას” გამარჯვებამდე რეგიონებში მაჟორიტარი დეპუტატობის კანდიდატების დაყენების ტაქტიკა მიიყვანს, რადგან დანარჩენი გზა მისივე შეფასებით, მანდატების განაწილებაში ვაჭრობაა.
რაც შეეხება თბილისს, გოცირიძე აცხადებს, რომ ორ ოლქში დიდუბესა და საბურთალოზე დღემდე არ არის დაკომპლექტებული, რაც საარჩევნო კამპანიას ხელს უშლის.
„აბა ნახეთ, რა ხდება გლდანში, სამგორში, მიდის გამოცოცხლებული, ინტენსიური საარჩევნო კამპანია, ვინაიდან გვყავს მაჟორიტარი და მაჟორიტარს აქვს გადამწყვეტი მნიშვნელობა საარჩევნო კამპანიის ამუშავებაში და შესაბამისად, პროპორციული სიის კუთხით გამარჯვებაში. ნუ გვავიწყდება, რომ მანდატების 80 პროცენტი ნაწილდება პროპორციული სიით. აქ გამარჯვება იქნება უკვე საწინდარი მეორე ტურში თითქმის ყველგან, ყველა მაჟორიტარული ოლქის მოგებისა. მაჟორიტარული ოლქი კი არ არის გამარჯვების ფორმულის მთავარი ნაწილი, არამედ პროპორციული სია, როცა გაერთიანებული ოპოზიცია იღებს იმაზე მეტ ხმას, ვიდრე “ქართული ოცნება” და მისი სატელიტი თუ სატელიტები. მარცხდები პროპორციულ სიაში? – მოდის ახალი ხელისუფლება და მეორე ტურში ფაქტობრივად, როგორც არაერთხელ გვინახავს, რჩება გამარჯვება იმ პოლიტიკურ გაერთიანებას, რომელიც იგებს პროპორციულ სიას. აი, ეს არის ჩვენი პრინციპი. ეს გზა მიგვიყვანს გამარჯვებამდე, დანარჩენი გზა არის უბრალოდ მანდატების განაწილებაში ვაჭრობა“, – განაცხადა გოცირიძემ.
