ნავალნის საკითხი, უკრაინის აღმოსავლეთ საზღვართან ბოლოდროინდელი სამხედრო დაძაბულობა და 2014 წელს ჩეხეთის რესპუბლიკაში შეიარაღების საწყობის აფეთქება – ეს ის საკითხებია, რომელიც ევროპარლამენტის პლენარულ სესიაზე განიხილეს.
სხდომაზე, რომელიც 4 საათზე მეტხანს გაგრძელდა. ევროპელმა დეპუტატებმა თითქმის ერთხმად დაგმეს რუსეთის აგრესიული პოლიტიკა და მზადყოფნა გამოთქვეს მხარი დაუჭირონ რუსეთის წინააღმდეგ მორიგ სანქციებს.
კანონმდებლებს, არც საქართველოში, ოკუპანტი ქვეყნის აგრესიული ქმედებები გამორჩათ. აღმოსავლეთ უკრაინაში არსებულ კონფლიქტთან ერთად ყურადღება საქართველოზეც გამახვილდა.
ევროპარლამენტარის ანდრიუს კუბილიუსის თქმით, სამ ასოცირებულ წევრ ქვეყანას, უკრაინას, საქართველოს და მოლდოვას უნდა მიეცეს უფრო მკაფიოდ გზა ევროკავშირში ინტეგრაციისთვის.
“ევროკავშირმა უნდა იზრუნოს აღმოსავლეთ პარტნიორების ქვეყნების და უპირველეს ყოვლისა, უკრაინის უსაფრთხოებაზე. მოდით, შევთავაზოთ მათ ის, რასაც ზოგი ექსპერტი უწოდებს ევროკავშირის უსაფრთხოების პარტნიორობას ან უსაფრთხოების კომპაქტს. მოდით, სამ ასოცირებულ წევრ ქვეყანას, უკრაინას, საქართველოს და მოლდოვას მივცეთ უფრო მკაფიო გზა ინტეგრაციისკენ. შესაძლოა, ეს იყოს ევროკომისიის ყოფილი პრეზიდენტის, რომანო პროდის მიერ წარმოდგენილი ფორმულა, რომელიც გულისხმობს ამ სამი ქვეყნისთვის ყველა სარგებლის შეთავაზებას, გარდა ევროკავშირის ინსტიტუტების წევრობისა. ამ სამი ქვეყნის ინტეგრაცია მოიტანს ეკონომიკურ ზრდას, სტაბილურობას და დემოკრატიის განმტკიცებას,” – განაცხადა ევროპარლამენტარმა ანდრიუს კუბილიუსმა.
ევროპარლამენტარმა ვიოლა ფონ კრამონმა კი, რუსეთის მიერ ოკუპირებულ ტერიტორიებზე შექმნილ მდგომარეობაზე ისაუბრა.
“პუტინმა დაიჩივლა, რომ ზოგიერთი სახელმწიფო რუსეთს ხშირად უმიზეზოდ თავს ესხმის. მან ეს განცხადება გააკეთა მაშინ, როდესაც ოკუპირებულ რეგიონებში მცხოვრებ უკრაინელებს რუსეთის პასპორტების აღებას აიძულებენ, როგორც ეს საქართველოს ოკუპირებულ ტერიტორიებზე ხდება. ვრცლად შემიძლია ვისაუბრო რუსეთის არადემოკრატიულ ქმედებებზე. თუმცა ნუთუ ჩემ მიერ ჩამოთვლილი მიზეზები არ არის საკმარისი იმისთვის, რომ რუსეთის გააკრიტიკო და სანქციები დაუწესო? ეს არ არის აგრესიული ქმედებები, რომელთაც წინ უნდა აღვუდგეთ? კოლეგებო, ჩვენ ვერ მივცემთ თავს უფლებას, ვიყოთ მიამიტები, როდესაც საქმე პუტინის რეჟიმს ეხება,” – განაცხადა ვიოლა ფონ კრამონმა.
ევროპარლამენტარ ჟოზეფ ბორელის შეფასებით, რუსეთი არის რეჟიმი, სადაც ეკონომიკა სუსტია.
“ჩვენი პოლიტიკური კონფრონტაცია რუსეთთან ხანგრძლივი და რთული იქნება. ჩვენ ამისთვის უნდა მოვემზადოთ. ეს არის რეალობა, რომლის უარყოფაც შეუძლებელია, რადგან რუსეთი დარწმუნებულია, რომ დასავლეთთან კონფრონტაცია არის უმოკლესი გზა, რათა გააძლიეროს თავისი ძალაუფლება. როდესაც ჩვენ რუსეთს ვთხოვთ ადამიანების უფლებების დაცვას, მოსკოვში ამას აღიქვამენ ეგზისტენციურ საფრთხედ. მოსკოვში ვიზიტისას მე ვუთხარი მათ: “მაპატიეთ, მაგრამ თქვენ თავად მოაწერეთ ხელი ადამიანის უფლებათა კონვენციას, ასევე მოვიქეცით ჩვენც. შესაბამისად, ჩვენ პარტნიორები ვართ და ჩვენ გვაქვს უფლება, თვალი მივადევნოთ, თუ როგორ ასრულებს მოსკოვი ამ ვალდებულებას”. მაგრამ რუსეთში ამას საფრთხეს აღიქვამენ, რადგან ეს არის რეჟიმი, რომლის ეკონომიკაც სუსტია და პერსპექტივა არ არის კარგი,” განაცხადა ჟოზეფ ბორელმა.
ევროპარლამენტარმა ანა ფოტიგამ კი, ალექსეი ნავალნის ღიად დაუჭირა მხარი.
“რუსეთის აგრესიულ ქცევაზე საუკეთესო პასუხი არის ჩვენ მიერ შეთანხმებული რეზოლუცია, რომელშიც მოვუწოდებთ რუსეთს, დაემორჩილოს საერთაშორისო წესრიგს, პატივი სცეს მეზობელი ქვეყნების სუვერენიტეტს, უსაფრთხოებას და ტერიტორიულ მთლიანობას. ჩვენ მხარს ვუჭერთ უკრაინას და ამის დემონსტრირების საუკეთესო გზა არის ისეთი პროექტების დაუყოვნებლივ შეჩერება, როგორიცაა რუსული გაზსადენი “ჩრდილოეთის ნაკადი-2”-ისა და ნატო-ს წევრობის სამოქმედო გეგმის გადაცემა უკრაინისა და საქართველოსთვის. ჩვენ, ვიშეგრადის ოთხეულის წევრი ქვეყნები სოლიდარობას ვუცხადებთ ჩეხეთს და მივესალმებით ამ ქვეყნის პასუხს სახელმწიფო ტერორიზმზე, რომელიც რუსეთის მოქმედმა ოფიცრებმა მოაწყვეს ჩეხეთის ტერიტორიაზე. ჩვენ მხარს ვუჭერთ რუსეთის ოპოზიციას და კერძოდ, ალექსეი ნავალნის,” – განაცხადა ფოტიგამ.
