ევროპული საბჭოს პრეზიდენტის, შარლ მიშელის პირადი წარმომადგენელი, შვედი დიპლომატი კრისტიან დანიელსონი საქართველოში 12 მარტს ჩამოვიდა. დანიელსონის საქართველოში გამოგზავნის გადაწყვეტილება შარლ მიშელმა 8 მარტს მიიღო. მისი ვიზიტის მთავარი მიზანი პოლიტიკურ პარტიებს შორის დიალოგის განახლებაა. ის უკვე რამდენიმე დღეა შეხვედრებს მართავს როგორც ხელისუფლების, ისე ოპოზიციის წარმომადგენლებთან.
პოლიტიკურ დიალოგში ჩართული მხარეები მოლაპარაკებების დეტალებზე არ საუბრობენ, თუმცა ცნობილია ჩარჩო, რომლის ფარგლებშიც დისკუსია მიმდინარეობს – ესაა შარლ მიშელის მიერ პირველ მარტს, ხელისუფლებასა და ოპოზიციის შეხვედრაზე ჩამოწერილი 6 საკითხი.
დანიელსონის ვიზიტი საქართველოში 14 მარტს უნდა დასრულებულიყო, თუმცა მან ქვეყანაში დარჩენის დრო გაახანგძლივა.
|ვინ არის კრისტიან დანიელსონი
კრისტიან დანიელსონი 1956 წლის 27 სექტემბერს შვედეთის ქალაქ ლიდინგეში დაიბადა. ის 1977-1981 წლამდე სტოკჰოლმის ეკონომიკის სკოლაში (Stockholm School of Economics), ბიზნეს ადმინისტრირებისა და ეკონომიკის მიმართულებით, სწავლობდა.
1981-1982 წლებში დანიელსონმა შვედეთის საგარეო საქმეთა სამინისტროში მეორე მდივნის თანამდებობას დაიკავა.
1982-1984 წლებში დანიელსონი ლუანდაში (ანგოლა) შვედეთის საელჩოში მეორე მდივანი იყო. 1984-1987 წლებში კი ის ეკონომიკური თანამშრომლობისა და განვითარების ორგანიზაციაში (OECD) შვედეთის დელეგაციის მეორე მდივნის თანამდებობას იკავებდა.
ევროკავშირის ცნობით, კრისტიან დანიელსონი 1987-1992 წლამდე შვედეთის საგარეო საქმეთა სამინისტროში პირველი მდივანი იყო. 1992-1995 წლებში ევროკავშირში შვედეთის მუდმივი წარმომადგენლობის მრჩევლის თანამდებობას იკავებდა.
2008-2010 წლებში დანიელსონი ევროკავშირში შვედეთის მუდმივი წარმომადგენელი იყო მანამდე, სანამ 2011 წელს ევროკომისიის გენერალური მდივნის მოადგილედ დაინიშნებოდა.
2013 წელს დანიელსონი გახდა გაფართოების საკითხებში გენერალური დირექტორი, 2015 წლიდან კი სამეზობლო საკითხების და გაფართოების თაობაზე მოლაპარაკების საქმეთა გენერალური დირექტორი. ამჟამად იგი შვედეთში ევროკომისიის წარმომადგენლობას ხელმძღვანელობს.
მომზადებულია Europa.eu-ს მიხედვით
