ჯანდაცვის მსოფლიო ორგანიზაციის განცხადებით, ხანგძლივი სამუშაო საათები წელიწადში ასობით ათასი ადამიანის სიცოცხლეს იწირავს.

ინფორმაციას ამის შესახებ BBC-ი ავრცელებს.

ამ საკითხზე ჩატარებული პირველი მასშტაბური კვლევის მონაცემების მიხედვით, 2016 წელს ხანგძლივი სამუშაო საათებით გამოწვეული ინსულტისა და გულის დაავადებების გამო, მსოფლიოში 745 000 ადამიანი გარდაიცვალა.

ყველაზე მაღალი მაჩვენებელი სამხრეთ-აღმოსავლეთ აზიასა და წყნარი ოკეანის დასავლეთ რეგიონში დაფიქსირდა.

ასევე, კვლევამ აჩვენა, რომ კვირაში 55 საათზე მეტი დროის განმავლობაში მუშაობა  ინსულტით გარდაცვალების რისკს 35%-ით, ხოლო გულის დაავადებებით – 17%-ით ზრდის.

კვლევის თანახმად, ხანგძლივი სამუშაო საათების გამო გარდაცვლილთა სამ მეოთხედს საშუალო ასაკის ან ხანდაზმული ადამიანები შეადგენდნენ.

ჯანმოში აცხადებენ, რომ ტენდენცია კორონავირუსის პანდემიის გამო, შესაძლოა, უფრო მეტად გაუარესდეს.

„გვაქვს რამდენიმე მტკიცებულება, რომელიც ცხადყოფს, რომ როდესაც ქვეყნები ლოქდაუნს აწესებენ, სამუშაო საათების რაოდენობა დაახლოებით 10%-ით იზრდება. დამსაქმებლებმა უნდა დააწესონ მუშაობის მაქსიმალური ლიმიტი, რაც დასაქმებულების პროდუქტიულობასაც გაზრდის“,- განაცხადა ჯანმოს წარმომადგენელმა.