მესტიის მუნიციპალიტეტში მოსულმა უხვმა ნალექმა გარკვეული პრობლემები შექმნა ხუთ სოფელში. თოვლისგან დაზიანებული ელექტროსადენების გამო სოფლებს არ მიეწოდება ელექტროენერგია.
მესტიის მუნიციპალიტეტის მერმა კაპიტონ ჟორჟოლიანმა აღნიშნა, რომ ზვავსაშიშროების გამო ჩაკეტილია კალა-უშგულის საავტომობილო გზა.
მისივე თქმით, მიმდინარეობს გზების გაწმენდითი და ელექტროენერგიის მიწოდების აღდგენის სამუშაოები.
მერმა „პრაიმტაიმნიუსთან” აღნიშნა,რომ ელექტროენერგიის მიწოდება უახლოეს დროში უნდა აღდგეს.
„კალა-უშგულის მიმართულებით გზა ჩაკეტილი გვაქვს, რადგან ვერ მიგვყავს ტექნიკა ზვავსაშიშროების გამო. ველოდებით გამოდარებას.
რაც შეეხება ელექტროენერგიას, არის გათიშვები, მაგრამ ბრიგადები 24 საათის რეჟიმში დადიან და მიმდინარეობს აღდგენა“, – განაცხადა კაპიტონ ჟორჟოლიანმა.
სვანეთში უკვე მესამე დღეა გადაუღებლად თოვს. მერის თქმით, აქ თოვლის საფარი 1 მეტრს აღწევს.
ავტორი: თეა შონია
