„ლელო“-ს საარჩევნო შეხვედრა ზუგდიდში საპროტესტო აქციის ფონზე გაიმართა. ეროვნული მოძრაობის ვეტერანებმა პარტიის ერთ-ერთი ლიდერი და თიბისი ბანკის დაფუძნებელი მამუკა ხაძარაძე რუსული პროპაგანდის ხელშეწყობასა და კოსტავა-გამსახურდიას წინააღმდეგ ბრძოლაში დაადანაშაულეს.
გარდა ამისა, ხაზარაძეს ფილარმონიასთან მომხდარი ინციდენტიც შეახსენეს, როდესაც ის მერაბ კოსტავას ფიზიკურად გაუსწორდა.
ეროვნული მოძრაობის ვეტერანებმა მამუკა ხაზარაძეს მოქალაქეების კუთვნილი ანაბრების მითვისებაშიც დასდეს ბრალი.
ამიტომ, სკანდირებდნენ, რომ ასეთი ადამიანის ადგილი პოლიტიკაში არ არის.
თავად მამუკა ხაზარაძე ვეტერანების მიერ გაჟღერებულ ბრალდებებს უარყოფს და აცხადებს, რომ ეს ყველაფერი მის წინააღმდეგ წინასაარჩევნოდ აგორებული ბინძური კამპანიაა.
„ლელოს“ წევრებსა და მომიტინგეებს შორის სიტყვიერი დაპირისპირება მოხდა. სიტუაცია სამართალდამცავებმა განმუხტეს.
