ექსპერტი გია ხუხაშვილი ფიქრობს, რომ ექს-პერმიერ გიორგი გახარიას პოლიტიკაში დაბრუნება მისთვის ბევრ სირთულეს წარმოქმნის, თუმცა საზოგადოების საკმაოდ დიდი მხარდაჭერა აქვს.
„მას აქვს პოლიტიკური მომავალი. კარგი იქნებოდა, პოლიტიკაში დარჩენას თუ აპირებდა, ცოტა აქტიურად შემოსულიყო და მას ამის შანსი ჰქონდა, რომელიც გაუშვა. თუმცა, ჩემი აზრით, საზოგადოებაში ახლაც საკმაო მხარდაჭერა აქვს აქვს, ასე რომ საკმაოდ საინტერესო ელემენტი გაჩნდება ქართულ პოლიტიკურ რუკაზე.
ხელისუფლება ყველა ტროლს აამუშავებს ცოცხალს და მკვდარს, იმისთვის, რომ წინასწარ დამარხონ, თუ ამ შეტევას გაუძლო, რა თქმა უნდა, საინტერესო იქნება.
რაც შეეხება შეცდომას, მე ვფიქრობ, რომ ეს მისი გადადგომა იყო. მისი გადასაწყვეტი იყო, სპეცოპერაცია ჩატარდებოდა თუ არა, ინსტიტუციურად მას ამის ყველა ბერკეტი ეკავა, მას შეეძლო, აეკრძალა სპეცოპერაციის ჩატარება, ამისთვის ყველა ბერკეტი ჰქონდა. თუ გომელაური არ დაემორჩილებოდა, შეეძლო დაუმორჩილებლობის გამო ყველა მინისტრი გადაეყენებინა. რადგან ამის უფლებამოსილება მას ჰქონდა. ამის შემდეგ ხელისუფლებას მისი მოშორება მხოლოდ პარლამენტის გზით შეეძლო და არა პოლიტბიუროს გადაწყვეტილებით, როგორც ეს მოხდა. პარლამენტში ეს პროცესი არ იქნებოდა ადვილი წასამართი, ასე რომ პარლამენტს მისი იმპიჩმენტი რომ მოეხერხებინა, მას ექნებოდა ბევრად უფრო უკეთესი სასტარტო პირობები, ვიდრე ახლა შეიძლება ჰქონდეს. ახლა მას ბევრად მეტი სირთულე ელოდება“, – განაცხადა ხუხაშვილმა.
რაც შეეხება გავრცელებულ ხმებს, რომ შეიძლება გიორგი გახარია „სტრატეგია აღმაშენებლის“ ლიდერ გიორგი ვაშაძესთან ალიანსში ვიხილოთ, ხუხაშვილი გვპასუხობს;
პრობლემებია, ჯერ მისი პოზიციონირება იქნება პრობლემური, რადგან ის ორმაგი ცეცხლის ქვეშ აღმოჩნდება. ერთი მხრივ, „ნაცები“ დააბრალებენ, რომ ბიძინას პროექტია, „ქოცები“ დააბრალებენ, რომ მიშას შეეკრა. ეს აღმოჩნდება საარტილერიო ცეცხლის ქვეშ, ჯერ ამას უნდა გაუძლოს, არ იქნება მარტივი ამოცანა. წინასწარ რამე სკეპტიციზმი არ იქნება სწორი“, – განაცხადა ხუხაშვილმა.
ცნობისთვის, პრემიერ-მინისტრობიდან გადადგომის შემდეგ გიორგი გახარიამ მედიასთან პირველი კომენტარი გააკეთა და განაცხადა, რომ არ აპირებს პოლიტიკიდან წასვლას.
გავრცელებულ ინფორმაციას გიორგი ვაშაძის პრესამსახურში არ ადასტურებენ.
