ჯო ბაიდენმა მოიგო არჩევნები და შედეგების შეცვლა წარუმატებელი იქნება, ეს ყველამ იცის, – ამის შესახებ ამერიკელმა რესპუბლიკელმა კონგრესმენმა, ადამ კინზინგერმა საკანონმდებლო ორგანოში სიტყვით გამოსვლისას განაცხადა.
კონგრესმენმა კაპიტოლიუმის შენობაში ტრამპის მომხრეების შეჭრა დაგმო და მას გადატრიალების მცდელობა უწოდა.
„რაც კაპიტოლიუმში ვიხილეთ, ეს არ არის ამერიკა, რომელიც მსოფლიოსთვის თავისუფლების და იმედის სახეა. კაპიტოლიუმზე შტურმი გადატრიალების მცდელობა იყო, რომლის მიზანი არჩევნების შედეგების შეცვლა იყო. მოქმედმა პრეზიდენტმა ეს წაახალისა და ცოტა რამ გააკეთა კაპიტოლიუმის და კონსტიტუციის დასაცავად. მე ვგმობ პრეზიდენტის მოქმედებას, რომ ეს დაუშვა“, – განაცხადა კინზინგერმა.
ვითარება ვაშინგტონში მას შემდეგ დაიძაბა, რაც დონალდ ტრამპის მხარდამჭერები კაპიტოლიუმის შენობაში შეიჭრნენ, სადაც საპრეზიდენტო არჩევნების შედეგებს ამტკიცებდნენ.
დემონსტრანტები ჯო ბაიდენის გამარჯვებას აპროტესტებდნენ. შენობიდან კონგრესმენთა ევაკუაცია განხორციელდა.
ვითარების კონტროლქვეშ აყვანას რამდენიმე საათი დასჭირდა, რის შემდეგაც კონგრესმა მუშაობა განაახლა.
