რუსეთში აზერბაიჯანის ელჩი ფოლად ბულბულოღლი სომხეთ-აზერბაიჯანის საზღვარზე არსებული კონფლიქტს ეხმაურება. ინფორმაციას freenews-ი ავრცელებს.
„აზერბაიჯან-სომხეთის საზღვარზე სიტუაციის გამწვავება არც ახალია და არც სენსაციური. მე არაერთხელ ვთქვი, ასევე პრეზიდენტმა ალიევმა არაერთხელ განაცხადა, რომ აზერბაიჯანი არასდროს შეეგუება საკუთარი ტერიტორიების 20 პროცენტის დაკარგვას. როგორ ფიქრობთ, ათმილიონიანი, მდიდარი, განვითარებული ინფრასტრუქტურის, შეიარაღებული ქვეყანა დაუშვებს, რომ მისი ტერიტორიები განუსაზღვრელი ვადით იყოს ოკუპირებული? ეს ხომ შეუძლებელია“, – განაცხადა ბულბულოღლიმ.
როგორც ბულბულოღლიმ აღნიშნა, მშვიდობიან მოლაპარაკებებს არანაირი შედეგი არ აქვს.
„ვიდრე აზერბაიჯანის ტერიტორიები ოკუპირებულია, ასეთი ინციდენტები გარდაუვალია. ჩვენ ამას ვამბობდით 2016 წელსაც, როდესაც აქტიური სამხედრო მოქმედებები მიმდინარეობდა. სამწუხაროდ, ბევრი ქვეყანა, ჩვენი მეზობლები, ამ კონფლიქტის გაყინვას ცდილობენ, რომ ის უსასრულოდ გაგრძელდეს. მოლაპარაკებები მოლაპარაკებებისთვის არ უნდა იმართებოდეს. თუ მათ შედეგი არ აქვთ, ბუნებრივია, იქნება სამხედრო მოქმედებები. აუცილებელია, ერთხელ და სამუდამოდ მკაფიო იყოს პოზიცია. საუბარია აზერბაიჯანის ტერიტორიიდან უცხო ქვეყნის ჯარისკაცების გაყვანაზე. ვიდრე ისინი იმყოფებიან აზერბაიჯანის ტერიტორიაზე, ასეთი კონფლიქტები გაგრძელდება და ერთ დღესაც შესაძლოა, მასშტაბურ ომში გადაიზარდოს, რომელიც კატასტროფული იქნება მთელი რეგიონისთვის“,- განაცხადა ელჩმა.
ცნობისთვის, 12 ივლისს აზერბაიჯანი-სომხეთის საზღვარზე სომეხ და აზერბაიჯანელ სამხედროებს შორის დაპირისპირება მოხდა.
ბაქოს და ერევანს წლებია კონფლიქტი აქვთ აზერბაიჯანის საერთაშორისოდ აღიარებული რეგიონის, მთიანი ყარაბაღის გარშემო. სომხეთის მიერ მხარდაჭერილმა სეპარატისტებმა აზერბაიჯანის ეს, ძირითადად სომხებით დასახლებული რეგიონი ადრეული 1990-იანი წლების ომით მოიპოვეს. ომს 30,000-მდე ადამიანი შეეწირა. კონფლიქტის გადაჭრის დიპლომატიურ მცდელობებს მნიშვნელოვანი პროგრესი არ მოჰყოლია.
