მეზობელი ქვეყნების, აზერბაიჯანისა და სომხეთის ლიდერები საქართველოს ხელისუფლებას არჩევნებში გამარჯვებას ულოცავენ.
სომხეთის რესპუბლიკის პრემიერ-მინისტრმა ნიკოლ ფაშინიანმა საპარლამენტო არჩევნებში მმართველი გუნდის გამარჯვება საქართველოს პრემიერ-მინისტრ გიორგი გახარიას მიულოცა და წარმატებები უსურვა.
ნიკოლ ფაშინიანის და გიორგი გახარიას სატელეფონო საუბარი დღეს შედგა.
მხარეებმა ხაზი გაუსვეს ორ ქვეყანას შორის არსებულ მეგობრულ და კეთილმეზობლურ ურთიერთობებს.
აზერბაიჯანის პრეზიდენტი ილჰამ ალიევი კი საპარლამენტო არჩევნებში პარტია „ქართული ოცნების“ გამარჯვებას ბიძინა ივანიშვილს ულოცავს.
„ჩემი და პარტიის, „ახალი აზერბაიჯანის“ სახელით, გულითადად გილოცავთ საქართველოს საპარლამენტო არჩევნებში „ქართული ოცნება – დემოკრატიული საქართველოს“ გამარჯვებას.
საპარლამენტო არჩევნებში ზედიზედ მესამედ იმ პარტიის გამარჯვება, რომლის ლიდერიც თქვენ ხართ, კიდევ ერთხელ ადასტურებს თქვენი კურსის მიმართ მეგობარი ქართველი ხალხის მხარდაჭერას.
მჯერა, რომ თქვენი გამარჯვება ხელს შეუწყობს ქვეყნის აყვავებას და მომავალშიც წვლილს შეიტანს აზერბაიჯან-საქართველოს მეგობრობისა და კეთილმეზობლობის მრავალსაუკუნოვან ტრადიციებზე დაფუძნებული სტრატეგიული პარტნიორობის მრავალმხრივ განვითარებაში.
ვსარგებლობ შემთხვევით და გისურვებთ ჯანმრთელობას, წარმატებას, მეგობარ ქართველ ხალხს კი მუდმივ მშვიდობას, სიმშვიდესა და კეთილდღეობას ვუსურვებ“, – ვკითხულობთ მისალოც წერილში.
საპარლამენტო არჩევნებში „ქართული ოცნების“ გამარჯვება ილჰამ ალიევმა გუშინ პრემიერ-მინისტრ გიორგი გახარიასაც მიულოცა.
