„ბარსელონას“ ფეხბურთელს კორონავირუსი დაუდგინდა. ინფორმაცია ამის შესახებ კატალონიური კლუბის ოფიციალურ ვებგვერდზე გავრცელდა.

ინფიცირებული ფეხბურთელის ვინაობა არ სახელდება.

„2020-2021 წლების სეზონისთვის მზადების დაწყებამდე მთავარი გუნდის 9 ფეხბურთელმა PCR-ტესტირება გაიარა და ერთ-ერთი მათგანის ტესტის პასუხი დადებითი აღმოჩნდა. ფეხბურთელს დაავადებისთვის დამახასიათებელი სიმპტომები არ აღენიშნება, ის თავს კარგად გრძნობს და თავის სახლში, კარანტინში იმყოფება. ინფიცირებულ ფეხბურთელთან კონტაქტში მყოფი ყველა ადამიანი ტესტირებას გაივლის“, – ნათქვამია განცხადებაში.

„ბარსელონას“ განმარტებით, ინფიცირებულ ფეხბურთელს არ ჰქონია კონტაქტი მთავარი გუნდის ფეხბურთელებთან, რომლებიც 13 აგვისტოს ლისაბონში, ჩემპიონთა ლიგის 1/4-ფინალურ მატჩში მიიღებენ მონაწილეობას.