დღეს ბათუმში მუნიციპალური ინსპექციის შენობასთან სამსახურიდან გათავისუფლებულმა თანამშრომლებმა აქცია გამართეს.
როგორც აქციის მონაწილეები აცხადებს, ისინი პოლიტიკური ნიშნით არიან გათავისუფლებული, რადგან „თავისუფლების კვარტალში“ დაინახეს, სადაც გაერთიანებული ოპოზიცია აქციებს მართავს.
მათივე ინფორმაციით, სამსახურიდან 31 დეკემბერს გაათავისუფლეს და მხოლოდ დღეს გაიგეს ამის შესახებ. აქციით მონაწილეების თქმით, დღეს უნდა შეხვედროდნენ მუნიციპალური ინსპექციის ხელმძღვანელობას, თუმცა მათთან შესახვედრად არავინ გამოსულა.
„ერთი თვის წინ დამაწერინეს განცხადება არჩილ კონცელიძის სახელზე, რომ გთხოვთ გამიგრძელოთ სამთვიანი ხელშეკრულება. დავწერე, ჩვეულებრივად დავტოვე ეს განცხადება და წავედი. გუშინ თანამშრომელი მირეკავს, დაგვირეკეს თათბირია და შენ არ მოდიხარო? დავეჭვდი, ჩემთვის არავის არ დაურეკავს. მივედი სამსახურში. მეუბნება ჩვენი კოორდინატორი, შენ გათავისუფლებული ხარ, ხელშეკრულება არ ჩამოვიდაო. საიდან უნდა ჩამოსულიყო, ვკითხე, აქ არის უფროსი და მე მის სახელზე დავწერე განცხადება. ჩამოვედი და ვეკითხები, რატომ გამათავუსუფლეთ-მეთქი. პანდემია არის და ხელფასებს ვერ ვარიგებთო. ხალხო გამაგებინეთ, ჩემი ხელფასი, 600 ლარი თუ ყოფნის ამ გაჭირვებას, შემოვივლებ თავზე. მარტოხელა ვარ, მაქვს საბანკო ვალდებულებები, ვზრდი წლინახევრის შვილიშვილს, რა გავაკეთო ვერ ვხვდები. პოლიტიკური ნიშნით გამათავისუფლეს, იმიტომ, რომ დამინახეს აქციაზე. ვიყავი უბნის უფროსი 50-ე უ საარჩევნო უბანზე, ლევან ვარშალომიძემ გაიმარჯვა იქ, რესან კონცელიძემ წააგო და ამაზე არიან გაბრაზებული. აბა მე პირნათლად ვასრულებ ჩემზე დაკისრებულ მოვალეობას. სამსახურში გამეფებულია ნეპოტიზმიც და ყველაფერი. ისეთი თანამშრომლებია, საერთოდ არ დადიან, არ მუშაობენ და ხელფასს ღებულობენ. მე წვიმაში, თოვლში გარეთ ვდგავარ და უმეტესობა ტყუილად ღებულობს ხელფასს“, – განაცხადა ერთ-ერთმა გათავისუფლებულმა ლელა ჩხაიძემ.
როგორც „პრაიმტაიმნიუსს“ განუცხადეს, თანამშრომლებს ხელშეკრულების ვადა ამოეწურათ.
ავტორი: ნაირა ქობულაძე
