გერმანულმა „ბიოენტექმა“ და მისმა ამერიკულმა პარტნიორმა „ფაიზერმა“ მათ მიერ შემუშავებულ ვაქცინაზე ლიცენზიისთვის, ევროკავშირის წამლის სააგენტოს მიმართეს.  როგორც BioNTech-ის ვებგვერდზე ვკითხულობთ,  უწყებამ მათი განაცხადის განხილვა 1-ელ დეკემბერს დაიწყო.

თუ EMA ჩათვლის, რომ ვაქცინა BNT162b2-ის გამოყენების უპირატესობები აჭარბებს მისი გამოყენების რისკებს, უწყება კომპანიებს ბაზარზე შეზღუდული წვდომის ნებართვას მისცემს, ავტორიზაციის შემთხვევაში კი ვაქცინა ევროპაში ხელმისაწვდომი უკვე უახლოეს კვირებში გახდება.

შეზღუდული წვდომა პრეპარატის გამოყენების დროებით ნებართვას ნიშნავს, რაც მიუთითებს იმაზე, რომ პრეპარატის კლინიკური ცდები დასრულებული არაა.

ევროპის წამლის სააგენტოში აცხადებენ, რომ თუ „ფაიზერიც“ და მისი კონკურენტი „მოდერნაც“ მათ მიერ შემუშავებული ვაქცინების შესახებ სრულ დოკუმენტაციას დროულად მიაწვდიან, სააგენტო მასალებს არაუგვიანეს 12 იანვრამდე განიხილავს.

ამასთან, კომპანიებმა მსგავსი მოთხოვნით აშშ-ის საკვებისა და მედიკამენტების ადმინისტრაციასაც მიმართეს.