დილიდან ჩოხატაურის მუნიციპალიტეტში, სოფელ ბუკნარში, სადაც წუხელ რელიგიურ ნიადაგზე დაპირისპირება მოხდა, მუსლიმები თავიანთ სალოცავთან არიან შეკრებილები და ადგილობრივი ხელისუფლების წარმომადგენლებს ელოდებიან.
მუსლიმი მოსახლეობის მთავარი მოთხოვნაა, ადგილობრივმა ხელისუფლებამ უფრო ქმედითი ნაბიჯები გადადგას კონფლიქტის მოსაგვარებლად.
„ჩვენ არ ჩავალთ ოზურგეთში გუბერნატორთან, მას და ჩოხატაურის მერს ველოდებით აქ, კეთილი ინებონ, მოვიდნენ და ერთხელ და სამუდამოდ გადავჭრათ ეს პრობლემა“,- აცხადებენ ადგილობრივები.
შეგახსენებთ, წუხელ რელიგიურ ნიადაგზე, სოფელ ბუკნარში, მუსლიმებსა და ქრისტიანებს შორის დაპირისპირება მოხდა. დაშავდა ორი ახალგაზრდა, მათშორის ერთი არასრულწლოვანი, მას, თავზე ნაკერები დაადეს.
აღნიშნულ ფაქტზე, შინაგან საქმეთა სამინისტროს გურიის პოლიციის დეპარტამენტის თანამშრომლებმა, ჩატარებული ოპერატიული და საგამოძიებო ღონისძიებების შედეგად, 1985 წელს დაბადებული გ.ს. დააკავეს. მას ბრალი ძალადობაში ედება.გამოძიება საქართველოს სსკ-ის 126-ე მუხლის პირველი ნაწილით მიმდინარეობს, რაც ცემას ან სხვაგვარ ძალადობას გულისხმობს და ექვსი თვიდან ერთ წლამდე ვადით თავისუფლების აღკვეთას ითვალისწინებს.
ავტორი: ნინე ულუმბელაშვილი
