მოძრაობა„სამშობლოს გადასარჩენად“ ორგანიზებით, დღეს სომხეთში მორიგი საპროტესტო აქცია გაიმართება.
ინფორმაციას ამის შესახებ სომხური მედია ავრცელებს.
დემონსტრაცია ადგილობრივი დროით 18:00 საათზე, ბაგრამიანის პროსპექტზე დაიწყება.
„ძვირფასო თანამემამულეებო!
თითოეული თქვენგანის მონაწილეობა ძალიან მნიშვნელოვანია. ამ მონაწილეობით დავადასტურებთ იმას, რომ არ შევეგუებით ყველა სახელმწიფო ინსტიტუტის ერთი ადამიანის მიერ დემონტაჟს. ჩვენ მხარს დავუჭერთ არმიას, პრეზიდენტს და ბოლომდე დავიცავთ სახელმწიფოებრიობას. ამ მთავრობის წასვლა გარდაუვალია. გავაერთიანოთ ჩვენი ძალები“,- ნათქვამია მოძრაობა„სამშობლოს გადასარჩენად“ მიერ გავრცელებულ განცხადებაში.
შეგახსენებთ, რომ სომხეთში ვითარება მას შემდეგ დაიძაბა, რაც 25 თებერვალს ქვეყნის შეიარაღებული ძალების გენერალურმა შტაბმა პრემიერ-მინისტრ ფაშინიანის გადადგომა მოითხოვა. ამას წინ უსწრებდა პრემიერ-მინისტრის გადაწყვეტილება, რომლის თანახმადაც გენშტაბის უფროსის მოადგილე ტირან ხაჩატრიანი თანამდებობიდან გაათავისუფლეს. ამის შემდეგ სომხეთის მთავრობის მეთაურმა უკვე გენშტაბის უფროსის ონიკ გასპარიანის გათავისუფლება მოითხოვა. თუმცა ამ განკარგულებას სომხეთის პრეზიდენტმა ხელი არ მოაწერა და განაცხადა, რომ განკარგულება ქვეყნის კონსტიტუციას ეწინააღმდეგება.
