წინ არის დაგეგმილი მე-5 რაუნდი, რომელიც, ჩემი აზრით, უნდა იყოს შედეგის მომტანი, რომელიც გულისხმობს კონკრეტული შეთანხმების გამოტანას, – ამის შესახებ “მოქალაქეების” ერთ-ერთმა ლიდერმა ლევან იოსელიანმა “რუსთავი 2-ის” ეთერში განაცხადა.
მისივე თქმით, შექმნილი პოლიტიკური კრიზისიდან ერთადერთი გამოსავალი შეთანხმებაა, ხოლო ალტერნატივა ქაოსია.
“ცუდად რომ ჩაატარა “ქართულმა ოცნებამ” არჩევნები, ეს დადასტურებული ფაქტია და ამისთვის გვაქვს შანსი, რომ დღეს ჩვენ მათ გადავახდევინოთ მაღალი პოლიტიკური ფასი. ამას უსვამს ხაზს ქალბატონი კელი დეგნანი, ეს არის შესაძლებლობა, რომ ამ ქვეყანამ დაიწყოს ახალ წრეზე სიარული, რაც გულისხმობს არჩევნებისთვის ნდობის დაბრუნებას.
ჩემი აზრით, ეს არის ყველაზე მნიშვნელოვანი, რომ არჩევნებს დაუბრუნდეთ შინაარსი, ამისთვის კი, რაღაც კონკრეტული ნაბიჯები უნდა გადავდგათ. ამისთვის უნდა შვთანხმდეთ არჩევნებთან დაკავშირებით ბევრ სხვადასხვა საკითხზე და შემდეგ, ამ დოკუმენტით უნდა გავაგრძელოთ პარლამენტში მუშაობა. ეს ჩემი აზრია. მე ვერ ვხედავ სხვა გამოსავალს, გარდა იმისა, რომ თვითმმართველობის არჩევნებისთვის ისე კარგად მოემზადოს ოპოზიცია, რომ შეძლოს თვითმმართველობის დონეზე დაამარცხოს “ქართული ოცნება.” რა არის სხვა გამოსავალი ამის გარდა? ის გამოსავალი, რომელიც ამის მიღმა არის, არ არის გამოსავალი, ის არის ამ ქვეყნისთვის საუარესო სცენარი, რაც გულისხმობს ქაოსს და მე ამ ქაოსში მონაწილეობის მიღება არ მინდა,”-განაცხადა ლევან იოსელიანმა.
