კორდობაში მცხოვრები ქართველები, ოქტომბრის საპარლამენტო არჩევნებისათვის, ხელისუფლებას საარჩევნო უბნის გახსნას სთხოვენ.
ემიგრანტები ამბობენ, რომ იქ მცხოვრები ყველა ქართველის სურვილი, არჩევნებში მონაწილეობის მიღებაა.
„ჩვენ ყველას გვაქვს სურვილი, მონაწილეობა მივიღოთ არჩევნებში და ჩვენც გვინდა გადავწყვიტოთ სახელმწიფოს ბედი. აქ იმდენს ვშრომობთ და საქართველოში ვაგზავნით, რატომ არ უნდა გვქონდეს მონაწილეობის შესაძლებლობა? თუ ელექტრონული ფორმა დაინერგება, უფრო უკეთესი. ახლა კორონავირუსი მძვინვარებს, ყველა გადაადგილება საფრთხის შემცველია და ხარჯებსაც უკავშირდება. ამიტომ გვინდა, რომ საარჩევნო უბანი, ჩვენთანაც იყოს“, – განაცხადა ემიგრანტმა ესპანეთში, ნინო სულთანიშვილმა.
ემიგრანტები განმარტავენ, რომ წლების განმავლობაში, საკუთარი უფლების გამოყენებას და ხმის მიცემას ვერ ახერხებენ, რადგან საარჩევნო უბანი მხოლოდ მადრიდში იხსნება.
„მადრიდში წასვლა, სერიოზული პრობლემაა. ორი წელია, უშედეგოდ ვცდილობთ, ვინმეს ხმა მივაწვდინოთ. ძალიან ბევრი ვართ და ეს საკითხი ყველას გვაწუხებს. მადრიდში წასვლა ძნელია, არც დამსაქმებელი გიწყობს ხელს ყოველთვის, მით უმეტეს, ამ საშინელი ვირუსის ფონზე. ჩვენ ხომ მხარში ვუდგავართ ჩვენს ქვეყანას, არჩევნებში მონაწილეობა რატომ ვერ უნდა შევძლოთ?“, – ამბობს ემიგრანტი, ია ჭიკაძე.
უახლოეს დღეებში, ემიგრანტები, ხმის მიცემის უფლების მქონე, კორდობაში მცხოვრები, ყველა ქართველის აღწერას იწყებენ და ოფიციალური მოთხოვნით, საქართველოს საკონსულოსა და საგარეო საქმეთა სამინისტროს მიმართავენ.
ავტორი: ხათუნა გულიაშვილი
