„ვაპირებ და გადაწყვეტილი მაქვს საარჩევნო პროცესში მონაწილეობა იმ ღირებულებითი, პროგრამული და შინაარსობრივი გააზრებით, რაც გულისხმობს ადგილობრივი თვითმმართველობის გაძლიერების, ასევე განათლების რეფორმების, მოქალაქეთა კერძო საკუთრების დაცვისა და დეოკუპაციის მიმართულებით“,- ამის შესახებ „პრაიმტაიმნიუსთან“ „სახელმწიფო ხალხისთვის“ ლიდერმა ნიკა მაჭუტაძემ განაცხადა.
როგორც მან აღნიშნა, საბოლოოდ გადაწყვეტილი არ არის, რა ფორმით მიიღებს არჩევნებში მონაწილეობას.
“ჩემს თავს ვხედავ ამ თემატიკაში და მსურს, ჩვენს კონცეპტებს ფართო გავრცელება ჰქონდეს წინასაარჩევნო კამპანიებში. რაც შეეხება მონაწილეობის ფორმას, უფრო ამ შინაარსობრივი მონაწილეობის კუთხით იქნება, ვიდრე უშუალოდ მარათონში ჩაბმის. მიმდინარეობს მოლაპარაკებები და თუ რა გადაწყვეტილება მიიღება საბოლოოდ, აუცილებლად მოგახსენებთ“,- განაცხადა მაჭუტაძემ.
ინფორმაციისთვის, საპარლამენტო არჩევნები 2020 წლის 31 ოქტომბერს გაიმართება. საპარლამენტო არჩევნების შემდეგ, პარლამენტში 30 მაჟორიტარი და 120 პროპორციულ სიაში შესული დეპუტატი შევა.
