მიხეილ სააკაშვილის განცხადებას, რომ ნიკა მელიას გათავისუფლების შემთვევაში “ნაციონალური მოძრაობა” პარლამენტში უნდა შევიდეს, სოციალურ ქსელში “სტრატეგია აღმაშენებლის” ლიდერი, გიორგი ვაშაძე ეხმაურება.
“კვირას ქართული ოცნების დესტრუქცია, ორშაბათს ნაციონალური მოძრაობის.
სამშაბათს ორივე დათანხმდა, გაიმარჯვა მესამე გზამ ანუ ხალხის გზამ… მიხარია რომ ის შედეგი, რაშიც მთელი სული და გული ჩავდე პარტნიორებთან ერთად, იქცა საერთო ეროვნულ და ევროპულ შეთანხმებად”, – წერს გიორგი ვაშაძე.
ცნობისთვის, “ქართულ ოცნებასა” და ოპოზიციას შორის პოლიტიკური შეთანხმება შედგა – ორბელიანების სასახლეში შარლ მიშელის მიერ პარტიებისთვის წარდგენილ დოკუმენტზე ოპოზიციური პარტიის წარმომადგენელთა ნაწილმა ხელი მოაწერა.
დოკუმენტს ხელს შემდეგი პოლიტიკოსები აწერენ : დავით ბაქრაძე, ალეკო ელისაშვილი, ბადრი ჯაფარიძე, მამუკა ხაზარაძე, ვახტანგ მეგრელიშვილი, სალომე სამადაშვილი, ზურაბ ჯაფარიძე, ხათუნა სამნიძე და გიორგი ვაშაძე.
“ქართული ოცნებიდან” დოკუმენტს ხელს შალვა პაპუაშვილი და არჩილ თალაკვაძე აწერს.
