ოპოზიციაში პატიმრობაში მყოფი ექსპრეზიდენტის, მიხეილ სააკაშვილის გათავისუფლების ინიციატივასთან დაკავშირებით აზრთა სხვადასხვაობაა. “ლელოში” ამბობენ, რომ ისინი ამ მოთხოვნით შექმნილ საინიციატივო ჯგუფს არ შეუერთდებიან.
“ჩვენ არ ვიქნებით წარმოდგენილი ამ საინიციატივო ჯგუფში, ეს არის ცალკეული დღის წესრიგის მატარებელი საინიციატივო ჯგუფი, რომელშიც, ვფიქრობ, ჩვენი ჩართულობის მოლოდინი არავის არ ჰქონია და არც ექნება. ჩვენ ვართ ჩართული ფართო ოპოზიციურ ბრძოლაში, რომელიც არჩევნების, საგარეო თემატიკის, კოვიდის და სხვა დიდი საკითხების ირგვლივ მიმდინარეობს. ჩვენი პოზიციაა, რომ ჩვენ უნდა მივაღწიოთ ვადამდელ არჩევნებს, ამ ქვეყნის საგარეო კაპიტულაციის ცვლილებას, ძირეულ რეფორმებს ყველა იმ მიმართულებით, რომელიც მნიშვნელოვანია ამ ქვეყნის გადასარჩენად,”- აცხადებს “ლელოს” წევრი გრიგოლ გეგელია.











