ბოლო 24 საათში, გორში, კლინიკა „იავნანაში“ ინტოქსიკაციის სიმპტომებით კიდევ 15-მა მოზარდმა მიმართა, – აღნიშნულის შესახებ დედათა და ბავშვთა ცენტრ „იავნანა“-ს კრიტიკული მედიცინის დეპარტამენტის ხელმძღვანელმა, ლია ლაზარაძემ განაცხადა.  ამ ეტაპზე, სტაციონარში რჩება 25 პაციენტი.

„გასული 24 საათის განმავლობაში „იავნანა“-ს მომართა სულ 23-მა პაციენტმა, აქედან 15 პაციენტი იყო გასტროინტესტინალური დარღვევებით. მათგან ერთი პაციენტი მკურნალობას გადის კლინიკის პედიატრიულ განყოფილებაში, 14-ს აღმოვუჩინეთ დახმარება და გაეწერნენ ბინაზე. მთლიანობაში, ამ დიაგნოზით, სტაციონარში რჩება 25 პაციენტი, თუმცა, დღის განმავლობაში, მათი დიდი ნაწილი გაეწერება. მათი მდგომარეობა, ზოგადად, არის დამაკმაყოფილებელი და სტაბილური“, – განაცხადა „იავნანა“-ს კრიტიკული მედიცინის დეპარტამენტის ხელმძღვანელმა, ლია ლაზარაძემ.

შეგახსნებთ რომ გასული ოთხი დღის განმავლობაში, ,,გორმედის” ქსელის დედათა და ბავშვთა სამედიცინო ცენტრ „იავნანა“-ში ინტოქსიკაციის სიმპტომებით 100-ზე მეტი მოზარდი შეიყვანეს.