„ევროპული საქართველოს“ წევრები მალე საერთოდ პოლიტიკიდან გაიქცევიან,- ამის შესახებ ფრაქცია „ქართული ოცნების” თავმჯდომარემ, რატი იონათამიშვილმა განაცხადა.
„საზოგადოება კარგად ხედავს, რომ ამ პოლიტიკური პარტიის წევრები ხან საპარლამენტო კომიტეტებს ტოვებენ, ხან სასესიო სხდომებს და სხდომათა დარბაზიდან გარბიან. ახლა განაცხადეს, რომ უწყებათაშორის კომისიასაც ტოვებენ. ვფიქრობ, მათთვის უკეთესი იქნება, რომ ამის მიზეზები საკუთარ თავში ეძებონ, იქნებ თვითონ ვერ ართმევენ თავს ვერც ერთ ფორმატში და ვერც ერთ დონეზე იმ ვალდებულებებს, რომელიც გააჩნიათ და ეს არის იმის მიზეზი, რომ ყველა სივრციდან გარბიან, სადაც კი შეიძლება მათ ან ნებისმიერმა გაერთიანებამ საკუთარი წვლილი შეიტანოს,“- განაცხადა იონათამიშვილმა.
ცნობისთვის, „ევროპულმა საქართველოს“ შტაბის უფროსმა, სერგი კაპანაძემ განაცხადა, რომ პარტია უწყებათაშორისი კომისიის შეხვედრებში მონაწილეობას აღარ მიიღებს.
