პარლამენტის ფრაქცია “ქართული ოცნების” თავმჯდომარის მოადგილე, რატი იონათამიშვილი გავრცელებულ ჩანაწერებთან დაკავშირებით საუბრობს.
როგორც რატი იონათამიშვილი „დღის კურიერთან“ აცხადებს, მსგავსი ქმედებები მხოლოდ „ნაციონალური მოძრაობის“ ხელწერაა.
კითხვაზე, გაჟონა, თუ არა ინფორმაციამ სუსი-დან – რატი იონათამიშვილი პასუხობს:
„ნაციონალური მოძრაობა არის შეშინებული პოლიტიკური პარტია წაგების გამო და ისინი არიან მკადრებლები იმის, რომ მოახდინონ ფაბრიკაცია. ეს არა ერთხელ უნახავს ჩვენს საზოგადოებას, თუნდაც ბოლო წლების განმავლობაში.
ფაბრიკაციის ბოლო მაგალითს გეტყვით, 2012 წლამდე ჩაწერილი მასალა, ეს იყო 2007 წელს თუ 2008 წელს, მათი ხელისუფლების მხრიდან ჩაწერილი მასალა, წარმოგვიჩინეს როგორც გუშინდელი ჩანაწერი. ეს პირველი შემთხვევა ხომ არ იყო, მანამდეც იყო ზუსტად მსგავსი შემთხვევა.
იმაზე შევთანხმდეთ, რომ ნაციონალური მოძრაობა, თავისი პრობაგანდისტი მედიასაშუალებებთან ერთად ახდენს ფაბრიკაციას თუნდაც ძველი ჩანაწერების და იმას წარმოგვიჩენს, როგორც ახალ ჩანაწერებს,“ – აცხადებს რატი იონათამიშვილი.
ცნობისთვის, ბმული, სადაც ფაილები იყო განთავსებული, სხვადასხვა მედიასაშუალებამ 13 სექტემბერს, ელექტრონული ფოსტის საშუალებით მიიღო. ფაილებში წარმოდგენილია ფარული მიყურადებით მოპოვებული წერილობითი ინფორმაცია სასულიერო პირების, მათ შორის, მათი პირადი ცხოვრების შესახებ. ზოგიერთი ინფორმაცია შეიცავს სისხლის სამართლის დანაშაულის ნიშნებსაც.
ერთ-ერთი ჩანაწერი მეუფე ნიკოლოზსაც ეხება, რომელშიც ნათქვამია, რომ „მეუფე ნიკოლოზი რუსეთს ფულის სანაცვლოდ ინფორმაციას აწვდიდა“. ამ საკითხზე მან მედიასთან განაცხადა: „ყველამ იცოდა, რომ ამ ადამიანთან (ლოლიტა დანილინასთან) ვურთიერთობდი, სააკაშვილსაც გავაცანი“.
