„ქართული ოცნების“ აღმასრულებელი მდივანი, ირაკლი კობახიძე ვენეციის კომისიის განცხადებას ეხმაურება. როგორც კობახიძე ამბობს, სხვა შანსი, რომ ეს კანონპროექტი მიეღოთ არ იყო, რადგან პარლამენტი მუშაობას ამთავრებდა.
„ჩვენც გამოვთქვით მწუხარება თავის დროზე იმის გამო, რომ არ ჩამოუსწრო საქართველოს პარლამენტს ვენეციის კომისიის დასკვნამ. ისინი საუბრობდნენ, რომ ერთ კვირაში შეეძლოთ დასკვნის მომზადება, თუმცა, საბოლოო ჯამში, ვერ მოახერხეს. ჩვენ ავუხსენით ჩვენს პარტნიორებს, მათ შორის ვენეციის კომისიას, რომ მეცხრე მოწვევის პარლამენტი ამთავრებდა მუშაობას, სხვა შანსი, რომ ამ პარლამენტს ეს კანონი მიეღო, არ არსებობდა. ამ კანონის მიღება ამ მოწვევის პარლამენტის მიერ იყო მნიშვნელოვანი იმისთვის, რომ სათანადოდ გაგრძელდეს პროცესები სასამართლო სისტემაში. აქედან გამომდინარე, ჩვენ მივიღეთ ეს გადაწყვეტილება. ასევე, ვენეციის კომისიის დასკვნაში არის ასახული ის პროგრესი, რომელიც განხორციელდა ვენეციის კომისიის რეკომენდაციების შესაბამისად. სამი ფუნდამენტური რეკომენდაცია იყო და სამივე რეკომენდაცია სათანადოდ არის ასახული ჩვენს მიერ მიღებულ კანონპროექტში“, -განაცხადა კობახიძემ.
ცნობისთვის, ვენეციის კომისიამ მწუხარება გამოთქვა საერთო სასამართლოების შესახებ კანონპროექტის მიღების თაობაზე. როგორც კომისიის განცხადებაშია ნათქამი, საქართველოს ხელისუფლებამ მათ დაგვიანებით მიმართა, რაც არ იყო საკამრისი დრო და შესაბამისად კანონი კომისიის რეკომენდაციის გარეშე დამტკიცდა.
