„ნაციონალური მოძრაობის“ პოლიტსაბჭოს ერთ-ერთი წევრი, დიმიტრი შაშკინი “პრაიმტაიმნიუსთან” საუბრისას არაკანონიერს უწოდებს „ქართული ოცნების“ აღმასრულებელი მდივნის, ირაკლი კობახიძის განცხადებას, კონკრეტული პარტიების საარჩევნო რეგისტრაციის შესაძლო გაუქმებასთან დაკავშირებით.
შაშკინის თქმით, კობახიძე იურიდიული ჩარჩოებიდან გავიდა.
„პოლიტიკური თვალსაზრისით, ირაკლი კობახიძის განცხადება არის სრული ბოდვა, პარტიებს კრძალავდა ჰიტლერი, კრძალავს ლუკაშენკო და პუტინი. საქართველოში არც ისე ბნელა, რომ ვინმემ თვალები დახუჭოს იმაზე, რომ საქართველო, შესაძლოა, დავიდეს ჰიტლერის, პუტინისა და ლუკაშენკოს დონეზე. ერთ-ერთი ფუნდამენტური უფლება, რაც ადამიანებს გააჩნიათ, ეს არის პოლიტიკური პარტიის შექმნა. ბუნებრივია, რომ ამ პოლიტიკური დაშინებას, ბულინგს და პოლიტიკურ უვიცობას არავინ აჰყვება. მოკლედ, კობახიძის არავის ეშინია.
რაც შეეხება ამ საკითხის იურიდიულ მხარეს: იურიდიული თვალსაზრისით, არ შეიძლება, რომ კანონს უკუძალა ჰქონდეს. ანუ ახლა კანონი რომ მიიღო, თუ ის რამენაირად გაუარესებს მდგომარეობას იმ სუბიექტს, რომლის წინააღმდეგ ეს კანონი არის მიღებული, ამ კანონს ძალა არა აქვს. იურიდიულად, მიხეილ სააკაშვილი არ არის „ნაცმოძრაობის“ თავმჯდომარე. დემოკრატიის ფუნდამენტი არის სიტყვის თავისუფლება და მიხელ სააკაშვილს უფლება აქვს, ნებისმიერ დროს დააფიქსიროს საკუთარი პოზიცია“,- განაცხადა შაშკინმა.
ინფორმაციისთვის, გუშინ „ქართული ოცნების“ აღმასრულებელმა მდივანმა ირაკლი კობახიძემ განაცხდა, „დავაინიცირებთ კანონპროექტს, რომლითაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს.
