არჩევნების მეორე ტური ჩემსა და გია ვოლსკის შორის იქნება. ჩემსა და ანა დოლიძეს შორის მეორე ტურს გამოვრიცხავ, ეს შეუძლებელია – ამის შესახებ პარტია „გირჩის“ თავმჯდომარემ, ზურაბ ჯაფარიძემ „პალიტრა ნიუსის“ გადაცემაში განაცხადა.
„მე ოთხი წელი დავხარჯე მხოლოდ იმაზე,რომ ჩემს მეგობრებთან ერთად „გირჩი“ გამეკეთებინა და ამ ოთხი წლის განმავლობაში პარტია მართლა შევქმენი. მე რომ ახლა, პოლიტიკიდან საერთოდ წავიდე, „გირჩი“ არსებობას ჩვეულებრივად გააგრძელებს. ასევე „გირჩის“ ლიდერებიც რომ წავიდნენ, „გირჩის“ რამდენიმე ათეული ათასი მხარადამჭერი, იგივე იდეიის მხარდამჭერად დარჩება და ქართულ პოლიტიკაში მათი დაკვეთა რაღაცნაირად აისახება. იმის თქმა მინდა, რომ მე, საერთოდ სხვა წარსულით მოვდივარ, მართლა პოლიტიკას ვაკეთებ და მათ შორის, ჩემს მეგობრებთან ერთად პოლიტიკური პარტია მაქვს შექმნილი. ანა დოლიძეს კი, ახლა რასაც ვუყურებ, პოპულისტურ, სტანდარტულ თემებს ეხება.
ხმების მოპოვებას აპირებს იმით, რომ აზარტული თამაშები უნდა აიკრძალოს და ა.შ. იცის, რომ პრობლემატური თემაა, მოსახლეობას აწუხებს და უბრალოდ მაგ თემაზე ხმამაღლა ლაპარაკობს, მეტი არაფერი. ჩემი აზრით, პოლიტიკა ეს არ არის. ამ არჩევნებში ანა დოლიძე ვერ გაიმარჯვებს ვერც დიდუბის ოლქში, მას არც პარტია აქვს, პარლამენტში ვერ შევა, გაქრება პოლიტიკური სივრციდან და დარჩება ისევ სამოქალაქო აქტივისტად“, – განაცხადა ზურაბ ჯაფარიძემ.
