ზუგდიდის ახლადარჩეული საკრებულო დღეს პირველად შეიკრიბა.
„ნაციონალური მოძრაობის“ წარმომადგენლები სხდომაზე “თავისუფლება მიშას” წარწერიანი მაისურებით მივიდნენ.
სხდომა ადგილობრივი საოლქო საარჩევნო კომისიის თავმჯდომარე მირანდა მესხმა გახსნა. შემდეგ კი უხუცესი წევრი, დეპუტატი კონსტანტინე უბერი უძღვება.
დღეს სხდომაზე საკრებულოს სამანდატო და ხმის დამთვლელი დროებითი კომისიები უნდა აირჩიონ. ასევე, საკრებულოს თავმჯდომარე და მისი მოადგილეები.
სხდომის დაწყების წინ, ენმ-ის წევრებმა ფეხზე დგომით და ფოტოებით პატივი მიაგეს ბათუმის საკრებულოს გარდაცვლილი წევრის, ნუგზარ ფუტკარაძის ხსოვნას.
ენმ-ს წევრებმა საოლქო საარჩევნო კომისიის თავმჯდომარეს მირანდა მესხს სიმბოლურად ხელბორკილები გადასცეს ნიშნად იმისა, რომ მან არჩევნები გააყალბა და აუცილებლად ციხეში მოხვდება.
ზუგდიდის მეხუთე მოწვევის საკრებულოში მმართველ პარტიას უმრავლესობა არ აქვს. 22 მანდატით “ერთიანი ნაციონალური მოძრაობაა” წარმოდგენილი, 20-ით “ქართული ოცნება”, ხოლო 3-ით “გახარია – საქართველოსთვის”.
ავტორი: თეა შონია
