მერიის „საზოგადოებრივი ჯანდაცვის ცენტრის“ ცნობით, ხობში ვაქცინის გაკეთების მსურველი ათი ადამიანი ვერ შეგროვდა, რის გამოც ათ დოზიანი ფლაკონი არ გახსნეს.

უწყების ხელმძღვანელის შორენა საბახტარაშვილის თქმით, ამ დროისთვის ვაქცინაციის პროცესში ჩართვის სურვილი ხუთამდე მედიკოსმა გამოთქვა მხოლოდ.

“მუნიციპალიტეტში მივიღეთ ვაქცინის 250 დოზა და პროცესი დღეს უნდა დაწყებულიყო, თუმცა ასე არ მოხდა”,– ამბობს ხობის საზოგადოებრივი ჯანდაცვის ცენტრის ხელმძღვანელი შორენა საბახტარაშვილი.

მიუხედავად იმისა,რომ ხობელმა ექიმებმა ტრენინგები გაიარეს, მათ უმეტესობას სურვილი არ აქვს ვაქცინის გაკეთების.

“ვარ ალერგიული და თუ გადავწყვიტე ალბათ ფაიზერს გავიკეთებ”, – გვითხრა ხობის საავადმყოფოს მედდამ.

დაავადებათა კონტროლის ეროვნული ცენტრის სამეგრელო-ზემო სვანეთის განყოფილების ინფორმაციით, რეგიონის მასშტაბით ვაქცინაციის პროცესი გაგრძელდება.

NCDC-ის წარმომადგენლის ნანა ოდიშარიას თქმით, მიიღეს რეკომენდაცია, რომ აცრები ჰოსპიტალურ კლინიკებში გაკეთდეს და დაკვირვების პერიოდი 30-დან 45 წუთამდე გახანგრძლივდეს.

ცნობისთვის, სამეგრელო-ზემო სვანეთის რეგიონმა ვაქცინის 3 100 დოზა მიიღო და ხობის გარდა, ყველა მუნიციპალიტეტში ვაქცინაციის პროცესი მიმდინარეობს.

სულ რეგიონში ამ დროისთვის 120 მედიკოსი აიცრა.

ავტორი: თეა შონია