ბრიტანეთის სამხედრო ლაბორატორიის მეცნიერებმა პორტონ-დაუნში, კორონავირუსის გავრცელების შესასწავლად, ხელოვნური თითი შექმნეს. ამის შესახებ გაზეთი Times-ი წერს.
ეს გამოგონება მკვლევარებს დაეხმარება გაარკვიონ, რამდენ ხანს რჩება COVID-19 სხვადასხვა სახის ზედაპირზე. სილიკონის პროთეზს მიამაგრებენ სხვადასხვა მასალას, რომელზეც კორონავირუსია და დააკვირდებიან მისი იქ არსებობის ხანგრძლივობას.
ლაბორატორიის წამყვანი ტექნიკური ექსპერტი ტიმ ატკინსი აცხადებს, რომ ეს კვლევა მნიშვნელოვანია, ვინაიდან ვირუსი ინფიცირებული ზედაპირებიდანაც გადაეცემა ადამიანს.
„თუ მაქვს COVID-ი და შევეხები კედელს, მერე კი თქვენ შეეხებით ჯერ მას და შემდეგ საკუთარ სახეს, თქვენც შესაძლოა დაინფიცირდეთ… ამიტომაც შევქმენით ხელოვნური თითი. კვლევას კი უახლოეს კვირებში დავიწყებთ“, – განაცხადა მან.
ლაბორატორიის ვირუსოლოგი ამანდა ფლეპსი კი განმარტავს, რომ პროთეზი ძალიან ჰგავს ადამიანის ნამდვილ თითს, მასავით იხრება და აქვს იმიტირებული კანის ცხიმიც.
გამოცემის ცნობით, მეცნიერები აფართოებენ ჭკვიანი საათების გამოყენების მასშტაბებსაც, რომლებიც სამხედროებს ატყობინებენ კორონავირუსით, შავი ჭირით და ციმბირის წყლულით ინფიცირების შესახებ და ამასთან, აფრთხილებენ მრავალი სახების სისტემურ უკმარისობაზე რამდენიმე დღით ადრე, ვიდრე ის გამოვლინდება.
ეს ტექნოლოგია ადამიანს საშიში დაავადების შესახებ სამი დღით ადრე ატყობინებს.
თუ ცდები წარმატებით ჩაივლის, სამხედროებს ამ საათის მონაცემების გამოყენება საბრძოლო მოქმედებების დროსაც შეეძლებათ, რათა გაიგონ, სჭირდებათ თუ არა ჰოსპიტალიზაცია.
