საქართველოში კორონავირუსით ინფიცირებულთა რაოდენობა ყოველდღიურად რეკორდულად იზრდება. დღეს ვირუსის 578 ახალი შემთხვევა დადასტურდა.
ინფექციური საავადმყოფოს ბოქსირებული განყოფილების ხელმძღვანელი მარინა ენდელაძე „პრაიმტაიმნიუსთან“ საუბრისას აცხადებს, რომ კორონავირუსის პრევენციის მიზნით, მოსახლეობა რეკომენდაციებს არ იცავს, რასაც არასახარბიელო შედეგი მოჰყვება.
მისივე თქმით, არსებული მდგომარეობის მიუხედავად, შეზღუდვების კიდევ უფრო გამკაცრება ამ ეტაპზე არ იგეგმება.
„გარკვეული შეზღუდვები არის, სრული შეზღუდვა ვერ მოხდება. ყველაზე მეტად მოსახლეობის შეგნება არის მთავარი, ხალხმა უნდა დაიცვას რეგულაციები. თუ პირბადე არ გავიკეთეთ, არ იქნება კარგი შედეგები. დღევანდელი მომატება სრულიად მოსალოდნელი იყო, გუშინ იყო 554 შემთხვევა, 554 შემთხვევას რამდენი კონტაქტი ეყოლებოდა?! ესეც ცოტა არის.
ჩვენ თითქმის უკვე აღარ ვიცით, ვირუსი ვის შეიძლება ჰქონდეს და ვის – არა, ამიტომ უნდა დავიცვათ რეგულაციები. ხალხს უნდა გავაგებინოთ, რომ არსებობს კოვიდინფექცია და საჭიროა გაფრთხილება“,- განაცხადა ენდელაძემ.
კითხვაზე, რა შემთხვევაში იგეგმება რეგულაციების გამკაცრება, ენდელაძე გვპასუხობს:
„მკაცრი ზომების გატარება ჩემი პრეროგატივა არ არის. ჩვენ გვყავს საკმაოდ კომპეტენტური მთავრობა. ჩვენ იმდენად კარგი პრემიერ-მინისტრი გვყავს, რომ ყველაფერი საჭიროების შესაბამისად იქნება მიღებული. ჩვენი ბრალი იქნება, თუ თბილისში ბათუმის მსგავსი ვითარებას მივიღებთ, ბუნებრივია, არ უნდა მივიღოთ“,- განაცხადა ენდელაძემ.
ინფორმაციისთვის, დღეს საქართველოში კორონავირუსის მორიგი რეკორდული რაოდენობა – 578 ახალი შემთხვევა დაფიქსირდა.
ავტორი: ეკატერინე ზარნაძე
