მოკლული 19 წლის ფეხბურთელის, გიორგი შაქარაშვილის ბიძა მირიან ნიკოლაძე სამართალდამცავ უწყებას მოწოდებს, შაქარაშვილის საქმეზე განზრახ მკვლელობის საქმეზე ბრალდებული ერთ-ერთი არასრულწლოვნის, ზ.ხ-ს მამის, თამაზ ხომასურიძის მიერ მის მიმართ მუქარის შემცველი განცხადებებით დაინტერესდეს.
როგორც ნიკოლაძემ „პრაიმტაიმნიუსთან“ ინტერვიუში განაცხადა, ხომასურიძის განცხადებები ყოველგვარ სამართლებრივ ზღვარს სცდება.
მისივე თქმით, „ტვ პირველის” მიერ გავრცელებულმა ფარულმა ჩანაწერმა კიდე ერთხელ დაადასტურა, რომ ციხეში შაქარაშვილის მკვლელები ზიან.
მირიან ნიკოლაძე: გიორგის მკვლელებთან დაკავშირებით, კითხვის ნიშნები, ბუნებრივია, საერთოდ აღარ არის. ჩვენთვის, ოჯახისთვის კითხვის ნიშნები ისედაც არ იყო – ოჯახს იურიდიულ დონეზე დადასტურებულად მიაჩნია, რომ ეს ადამიანები სწორად არიან დაკავებულები. ფარული ჩანაწერების გაშვება ძალიან კარგი იყო საზოგადოების შინაგანი რწმენის გაძლიერებისთვის, ვინაიდან ხდებოდა იმის პროპაგანდა, რომ ციხეში უდანაშაულო ხალხი ზის.
ჯერ ის ამიხსენით, რატომ უნდა უნდოდეს დაზარალებულს უდანაშაულო კაცის დაჭერა, ეს ხომ აბსურდია. ჩვენ ყველამ ვნახეთ, რომ ეს პირები მართლაც არიან მკვლელების პოტენციალის მატარებლები, იგივე ითქმის არასრულწლოვანზე, რომელიც ეტრაბახება თავის თანამესაკნეებს, რომ მამამისი გარეთ მკვლელობებს მოაწყობს და ვიღაცებს სიცოცხლეს გამოასალმებს. მართლა ჩვენი საერთო ტრაგედიაა ის, რომ ასეთ ასაკში ბავშვს ეს ყველაფერი ეამაყება.
– ბატონო მირიან, ბოლო პერიოდია, რაც ერთ-ერთი არასრულწლოვნის, ზ.ხ-ს მამა თამაზ ხომასურიძე თქვენი მისამართით მუქარის შემცველ განცხადებებს ავრცელებს. მისი თქმით, ორგანიზაცია „თეთრს ისარს“, რომლის არსებობა კითხვის ნიშნის ქვეშ დგას, თქვენს მიმართ განაჩენი აქვს გამოტანილი. თქვენი აზრით, რეალური და საფრთხის შემცველია მისი განცხადებები?
– ხომასურიძე საკუთარი განცხადებებიდან გამომდინარე, კომიკურ ფიგურად ჩამოყალიბდა. შესაძლოა, მას რაიმე დაჯგუფებასთან ჰქონდეს კავშირი, თუმცა ასეთი ორგანიზაცია საქართველოში არ არსებობს. ასეთი ორგანიზაცია იყო 90-იან წლებში რუსეთში და ვიცი, რომ მისი შექმნა განპირობებული იყო იმით, რომ სამართალდამცავები კრიმინალს ვეღარ აკონტროლებდნენ. მაშინ ყოფილმა სამართალდამცველებმა შექმნეს ასეთი ორგანიზაცია, რათა დამნაშავეებს ფიზიკურად გასწორებოდნენ.
ხომასურიძეს უნდა, რომ ასეთი ორგანიზაცია საქართველოში არსებობდეს. ის არის სააკაშვილის ხელისუფლების ჩვეულებრივი პირმშო, ასეთ ადამიანებს ქმნიდნენ სააკაშვილის დროს. ის არასდროს არაფერს წარმოადგენა. ხომასურიძე მიიყვანეს და ჩასვეს აგენტურაში, თვითონ ჰყვება ამას, მე ხომ არ ვიგონებ. მოკლედ რომ ვთქვათ, ის კაცად მაშინ იქცა, როცა ვიღაცების ჩაშვება დაიწყო. მთელი მისი ცხოვრება ემსახურება იმას, რომ სხვა გააუბედუროს.
ხომასურიძე ამზადებს ნიადაგს, ერთ დღეს თვითონ ჩაიდინოს უბედურება და სხვას დაბრალდეს. საქართველოში არანაირი თეთრი ისარი არ არსებობს, თვითონ უნდა, რომ ანგარიშწორება აწარმოოს ყველას მიმართ.
– მისი მუქარის შემდეგ, თავს დაცულად გრძნობათ?
-საერთოდ არ მაინტერესებს ასეთი ადამიანების განცხადებები. 9 წელი ველოდებოდი, რომ ვიღაცა შარს მომდებდა, რადგან იმ ხელისუფლების მოწინაღმდეგეს ყოველთვის ემუქრებოდა საფრთხეები.
ყველას ძალიან აღიზიანებს ხომასურიძის ასეთი აგრესიული გამოსვლა. როგორია, ბავშვი მოგვიკლეს და მკვლელობაში ბრალდებულის ოჯახი გვემუქრება. რიგითი გამვლელებიც კი ისეთ აგრესიას გამოხატავენ ამ პატივცემულის მიმართ, რომ არ ვიცი.
– მისი განცხადებებით სამართალდამცავი უწყება უნდა დაინტერესდეს?
– რა თმა უნდა, უნდა დაინტერესდეს. ბოლო-ბოლო რა უნდა, დაღალა საზოგადოებაც. მე სასაცილოდაც არ მყოფნის მისი განცხადებები, მაგრამ ძალიან რთულია დედისთვის, ცოლისთვის, შვილის იმის დაჯერება, რომ მუქარებს რეალობაში არ განახორციელებს. აქამდე, როცა ხომასურიძის შესახებ შემეკითხნენ სამართალდამცველები, მე ვუთხარი, რომ დაანებეთ თავი, ცოტა ხანი შევხედოთ, თუ გადაიზარდა მისი განცხადებები აგრესიაში, მაშინ რეაგირება უნდა იყოს-თქო. ის მივიდა იმ სტადიამდე, რომ მის განცხადებებზე სამართლებრივი რეაგირება უნდა მოხდეს.
ავტორი: ეკატერინე ზარნაძე
