ნაციონალური მოძრაობის ერთ-ერთმა ლიდერმა, ნიკა მელიამ რუსთაველის გამზირზე, პარლამენტის წინ საპროტესტო აქციაზე განაცხადა, რომ საპროტესტო აქცია უწყვეტ რეჟიმში გაგრძელდება და ხალხი გარეთ იქნება მანამ, სანამ მოთხოვნები არ შესრულდება.
მელიამ მომიტინგეებს მოუწოდა, რომ ცესკოსთან გადაინაცვლონ და მთავრობას კომენდანტის საათი დაუწესონ.
„ცესკოში ვერავინ ვერ შემოვა და ვერ გავა, იქ არის ქაჯეთის ციხე, იქ რეჟიმის დავალებით მოპარეს საქართველოს არჩევნები და ჟვანია სახლში უნდა წავიდეს. ეს გეგმის ერთი ნაწილია, ოპოზიციას აქვს გაწერილი გეგმა, რომლითაც უახლოესი დღეები უნდა ვიაროთ, ეს მომდევნო 10 წლის განმსაზღვრელია. არ დავიღალოთ, მშვიდად, მტკიცედ და ყიჟინით წინ, ცესკოსკენ“. – განაცხადა ნიკა მელიამ.
პარლამენტთან ოპოზიციის საპროტესტო აქცია მიმდინარეობს. ლიდერებმა ხელისუფლებას ულტიმატუმი წაუყენეს:
31 ოქტომბრის არჩევნების შედეგების არალეგიტიმურად ცნობა, რიგგარეშე არჩევნების ჩატარება და ცენტრალური საარჩევნო კომისიის ხელახალი დაკომპლექტება.
ასევე ლიდერებმა იმ მსჯავრდებულების გათავისუფლება მოითხოვეს, რომლებსაც პოლიტპატიმრებად მიიჩნევენ. ამ მოთხოვნების შესასრულებლად მათ ხელისუფლებას დრო საღამოს 8 საათამდე მისცეს.
