„ნაციონალურმა მოძრაობამ“ ყველანაირი არგუმენტის გარეშე ამაზე უარი თქვა. ეს მათი საქმეა. ჩვენ ამაზე აღარ ვაპირებთ ორშაბათიდან საუბარს“, – ამის შესახებ „ევროპული საქართველოს“ ერთ-ერთმა ლიდერმა სერგი კაპანაძემ განაცხადა.
მისი თქმით, „ნაციონალურმა მოძრაობამ“ ყველანაირი არგუმენტის გარეშე თქვა უარი საერთო კანდიდატებზე.
„ჩვენ დღეს ვასრულებთ დალოდების რეჟიმს ამ საკითხთან დაკავშირებით. ჩვენი შეთავაზება ყველასთვის ცნობილია. მიგვაჩნია, რომ იყო სრულიად საღი აზრის ფარგლებში გაკეთებული შეთავაზება, რომ გაზრდილიყო შანსი და ერთიანი მაჟორიტარული კანდიდატებით პირველ ტურში გვქონოდა მეტი წარმატება. სამწუხაროა, რომ „ნაციონალურმა მოძრაობამ“ ყველანაირი არგუმენტის გარეშე ამაზე უარი თქვა. ეს მათი საქმეა. ჩვენ ამაზე აღარ ვაპირებთ ორშაბათიდან საუბარს.
მიგვაჩნია, რომ თუ მანამდე არ მოხდა შეთანხმების მიღწევა, ეს იქნება ჩავლილი ამბავი და ვაპირებთ უკვე, რომ ვკონცენტრირდეთ ჩვენს კამპანიაზე და იმაზე, რა პრობლემებიც გააჩნია მოსახლეობას. ვკონცენტრირდეთ იმაზე, თუ როგორ უნდა შეიცვალოს ხელისუფლება და რა უნდა გაკეთდეს შემდეგ უკვე კოალიციური მთავრობის პირობებში. ნებისმიერ შემთხვევაში ორშაბათიდან საარჩევნო კამპანია უნდა დაიწყოს. შეუძლებელია არჩევნებამდე სამი თვით ადრე მოსახლეობამ არ იცოდეს ვის ირჩევს“, – განაცხადა კაპანაძემ.
