სტრატეგიული პარტნიორების ვერც ერთ განცხადებაში ვერ ნახავთ, რომ პოლიციას არ ჰქონდა ამ ღონისძიების ჩატარების უფლება ან არაპროპორციული ძალა იქნა გამოყენებული, – ამის შესახებ იურიდიულ საკითხთა კომიტეტის თავმჯდომარემ, ანრი ოხანაშვილმა ნიკა მელიას დაკავების საკითხზე საერთაშორისო გამოხმაურებებთან დაკავშირებით განაცხადა.
ოხანაშვილის თქმით, მელიას დაკავების ღონისძიება ევროპული და ამერიკული სტანდარტების დაცვით ჩატარდა.
„ჩვენი სტრატეგიული პარტნიორების და საერთაშორისო თანამეგობრობის ვერც ერთ განცხადებაში ვერ ნახავთ შეფასებას, რომ კანონით, პოლიციას არ ჰქონდა ამ ღონისძიების ჩატარების უფლება, ან არაპროპორციული ძალა იქნა გამოყენებული, ან არასწორად ჩატარდა ეს ღონისძიება. ეს ღონისძიება ჩატარდა ევროპული და ამერიკული სტანდარტის დაცვით, რაც ნიშნავს მაქსიმალურ სიფრთხილეს, ზომიერებას, პროპორციული ძალის გამოყენებას და არა ძალის დემონსტრირებას. ჩვენ ვთანხმდებით, რომ სტრატეგიული პარტნიორების მოწოდება არის ძალიან ძვირფასი, მნიშვნელოვანი და ჩვენ ამას ყურადღებით ვეკიდებით. აქედან გამომდინარე, ეს ღონისძიება მაქსიმალური სიფრთხილით ჩატარდა. საქართველოში სამართლებრივ და დემოკრატიულ სახელმწიფოს ვაშენებთ. კანონის უზენაესობის განმტკიცებაში ჩვენ სწორედ სტრატეგიული პარტნიორები გვეხმარებიან. არავის არ მივცემთ იმის უფლებას, რომ ე.წ. პოლიტიკოსის სახელით, კანონი თქვენ თვალწინ დაარღვიოს და აბუჩად აიგდოს ქვეყნის კონსტიტუცია და კანონმდებლობა. როგორც კი ჩვენ ამის პრეცედენტს შევქმნით, მაშინ პრეტენზია არ უნდა გვქონდეს არც სამართლებრივ სახელმწიფოზე, არც კანონის უზენაესობაზე და არც იმ მიზანზე, რასაც ევროატლანტიკურ სივრცეში ინტეგრაცია ჰქვია“, – განაცხადა ოხანაშვილმა.
დღეს დილით, 23 თებერვალს, სამართალდამცველებმა ნიკა მელია ოფისში დააკავეს.
სამართალდამცველები „ნაციონალური მოძრაობის“ოფისში დღეს დილით შევიდნენ.
ნაციონალური მოძრაობის” ოფისთან სპეციალური დანიშნულების რაზმმა ცრემლსადენი გაზი გაუშვა.
დაპირისპირების დროს სამართალდამცველებმა 21 აქტივისტი დააკავეს.
მხარდამჭერებმა მელიას დაკავება გააპროტესტეს და პარლამენტთან აქცია გამართეს.
აქციის ორგანიზატორებმა მასშტაბური აქცია 26 თებერვალს დააანონსეს.
ნიკა მელიას დაკავების ფაქტის შესახებ დაიწერა საერთაშორისო მედიაშიც.
ცნობისთვის, ნიკა მელიას თბილისის საქალაქო სასამართლომ აღკვეთის ღონისძიებად პატიმრობა 17 თებერვალს შეუფარდა.
ყველა ინფორმაცია ნიკა მელიას საქმეზე ნახეთ ამ ბმულზე
