ჩვენი ოპოზიციის ზოგიერთ წარმომადგენელსა და არასამთავრობო ორგანიზაციებს ავიწყდებათ, რომ კანონი უზენაესია და მას ყველა უნდა დაემორჩილოს, – ამის შესახებ პარლამენტის თვითმმართველობის კომიტეტის თავმჯდომარემ სოზარ სუბარმა განაცხადა.

„მოწოდებები ხელისუფლების მიმართ, რომ არ აღესრულებინათ სასამართლოს გადაწყვეტილება, არის დაუშვებელი. გუშინწინ აღვნიშნეთ საქართველოს პირველი კონსტიტუციის 100 წლისთავი, სადაც 78-ე მუხლი ამბობს, რომ სასამართლო არის დამოუკიდებელი, ხოლო 79-ე მუხლში პირდაპირ წერია – არც აღმასრულებელ, არც საკანონმდებლო და არც ადმინისტრაციულ ორგანოებს არ აქვთ უფლება, შეცვალონ სასამართლოს გადაწყვეტილება ან არ შეასრულონ. ეს მოხდა დღეს საქართველოში, ეს კიდევ ერთხელ მეტყველებს იმაზე, რომ ჩვენ ვდგავართ სამართლებრივი სახელმწიფოს გზაზე. ის, რაც არის შიდა ტერორიზმი მეგობარ სახელმწიფოებში, შიდა ტერორიზმია საქართველოშიც, სხვანაირად ვერ ვუწოდებთ საქართველოს პარლამენტზე შტურმს და ამ შტურმის ხელმძღვანელობას, რაც ჩაიდინა ნიკა მელიამ მისი ბრალდების თანახმად“, – განაცხადა სუბარმა.

დღეს დილით, 23 თებერვალს, სამართალდამცველებმა ნიკა მელია ოფისში დააკავეს.

ნაციონალური მოძრაობის” ოფისთან სპეციალური დანიშნულების რაზმმა ცრემლსადენი გაზი გაუშვა.

დაპირისპირების დროს სამართალდამცველებმა 21 აქტივისტი დააკავეს.

სამართალდამცველები „ნაციონალური მოძრაობის“ოფისში დღეს დილით შევიდნენ.

ცნობისთვის, ნიკა მელიას თბილისის საქალაქო სასამართლომ აღკვეთის ღონისძიებად პატიმრობა 17 თებერვალს შეუფარდა.

ნიკა მელიას დაკავების ფაქტის შესახებ დაიწერა საერთაშორისო მედიაშიც.

ყველა ინფორმაცია ნიკა მელიას საქმეზე ნახეთ ამ ბმულზე