„სახელმწიფო ხალხისთვის“ დამფუძნებელი პაატა ბურჭულაძე გაერთიანებულ ოპოზიციასთან პოლიტიკურ კონსულტაციებს მართავს. ამის შესახებ „პრაიმტაიმნიუსისთვის“ გახდა ცნობილი.
ჩვენი ინფორმაციით, ბურჭულაძე, პოლიტიკაში ჩართვასთან დაკავშირებით, უახლოეს მომავალში გააკეთებს განცხადებას და 2020 წლის საპარლამენტო არჩევნებში აქტიურად მიიღეებს მონაწილეობას.
„სახელმწიფო ხალხისთვის“ ერთ-ერთი ლიდერის, ნიკა მაჭუტაძის განცხადებით, ბურჭულაძე განცხადებას კონსულტაციების დასრულებისთანავე გააკეთებს.
„ბატონი პაატა ბურჭულაძე მართავს კონსულტაციებს სხვადასხვა ფორმატთან დაკავშირებით. ამ კონსულტაციების დასრულებისთანავე იგი გააკეთებს განცხადებას საბოლოო გადაწყვეტილების შესახებ“-განაცხადა მაჭუტაძემ.
მაჭუტაძემ აღარ უპასუხა დამატებით კითხვებს, მათ შორის, იქნება თუ არა ბურჭულაძე გაერთიანებული ოპოზიციის მაჟორიტარობის საერთო კანდიდატი.
ინფორმაციისთვის, პაატა ბურჭულაძემ პარტია „სახელმწიფო ხალხისთვის“ 2016 წელს დატოვა და კარიერას დაუბრუნდა.
ავტორი: ეკატერინე ზარნაძე
