„პრაიმტაიმნიუსის“ ექსკლუზიური ინფორმაციით, პარტია „სახელმწიფო ხალხისთვის“ დამფუძნებელი, ცნობილი საოპერო ბანი პაატა ბურჭულაძე საქართველოში ჩამოსასვლელად და განცხადების გასაკეთებლად ემზადება. ამის შესახებ ინფორმაცია „სახელმწიფო ხალხისთვის“ ლიდერმა ნიკა მაჭუტაძემ სააგენტოს დაუდასტურა.

როგორც სააგენტოსთვის გახდა ცნობილი, ბურჭულაძე საქართველოში რამდენიმე დღეში ჩამოვა და პოლიტიკაში დაბრუნებასთან დაკავშირებით, განცხადებას ოფიციალურად გააკეთებს.

ნიკა მაჭუტაძე: ბურჭულაძე რამდენიმე დღეში  გააკეთებს განცხადებას, ეს ზუსტად ვიცი. ის ყველა კითხვას გასცემს პასუხს.  ბურჭულაძე ჯერ საქართველოში არ იმყოფება, მალე ჩამოვა.

კითხვაზე, ადასტურებს თუ არა მაჭუტაძე ინფორმაციას, რომ ბურჭულაძე გაერთიანებული ოპოზიციის სიის პირველი ნომერი იქნება, მაჭუტაძე გვპასუხობს:

„პაატასთან კომუნიკაცია ყოველდღიურად მაქვს, მაგრამ პოლიტიკაში დაბრუნებასთან დაკავშირებით – არა. დადასტურება არ შემიძლია, ბრუნდება თუ არა  ის პოლიტიკაში.  პაატა ჩემი ინფორმაციით, მზადაა შეიტანოს გადამწყვეტი წვლილი 2020 წლის არჩევნებში ივანიშვილის დამარცხებისთვის.

როგორი იქნება ეს ჩართვა –  საზოგადოებრივი, საერთაშორისო თუ საარჩევნო ფორმატით, ამის შესახებ არ შემიძლია, რომ რამე ვთქვა. სხვა ადამიანების მაგივრად სხვა ადამიანები ვერ ისაუბრებენ, რაც არ უნდა ახლობლები იყვნენ.  მას კანდიდატად  გაერთიანებული ოპოზიცია წარადგენს, თუ ასე მოხდა“,- განაცხადა მაჭუტაძემ.

ინფორმაციისთვის, იმ შემთხვევაში, თუ კორონავირუსის პანდემიამ დღის წესრიგი არ შეცვალა, საპარლამენტო არჩევნები 2020 წლის 31 ოქტომბერს გაიმართება. არჩევნების შემდეგ, პარლამენტი 30 მაჟორიტარით და 120  – პროპორციულ სიაში შესული შესული დეპუტატით დაკომპლექტდება.

ავტორი: ეკატერინე ზარნაძე