პანკისის ხეობის სოფელ ჯოყოლოში, შმაგი მუთოშვილის განთავისუფლების მოთხოვნით, საპროტესტო აქცია გაიმართა.

ადგილობრივი მოსახლეობა მიიჩნევს, რომ მუთოშვილი უდანაშაულოა და მისი დაკავება,  მტკიცებულების გარეშე მოხდა.

ოჯახის ახლობლებისა  და მუთოშვილების გვარის წარმომადგენლების მტკიცებით, შმაგი მუთოშვილის სახლიდან ამოღებული იარაღი, დაკავებისას, პოლიციამ  დაულუქავად წაიღო.

აქციის მონაწილეებისათვის მიუღებელია, რომ, შმაგი მუთოშვილის ძმის,  ვისური მუთოშვილის მკვლელობისათვის დამანაშავეს 11 წლიანი სასჯელი განესაზღვრა, ხოლო შმაგი მუთოშვილს,  მკვლელობის მცდელობისათვის,  20 წლიანი პატიმრობა ემუქრება.

მუთოშვილების ოჯახი, მიიჩნევს, რომ ვისური მუთოშვილის მკვლელობაში მონაწილე ყველა პირი დასჯილი არ არის.

„ამ ოჯახის ტრაგედია, მთელი სოფლის ტრაგედიაა. რატომ უნდა დაისაჯოს მკვლელი 11 წლით, მკვლელობის მცდელობისთვის კი 20 წლით. თანაც, ვინც შმაგის იცნობს, იცის, რომ ის ჩამდენი არ არის. სახლში ბავშვები და მოხუცი მშობლები ჰყავს, უპატრონოდ როგორ დატოვებდა. ან სადაური კანონია, რომ პოლიციამ  იარაღი დაულუქავად უნდა გაიტანოს?  ვითხოვთ უდანაშაულო ადამიანი გაანთავისუფლონ“,-  განაცხადა „პრაიმტაიმთან“ საუბარში ოჯახის ნათესავმა,  ნაზი ბორხაშვილმა.

სოფელ ჯოყოლოში, დაპირისპირებული გვარების,  მუთოშვილ- ქავთარაშვილების საქმის სამართლებრივ დეტალებზე სამუშაოდ, სპეციალური ჯგუფის შექმნას გეგმავენ.

რაც შეეხება ქისტური ადათის მიხედვით შერიგებას, მუთოშვილები ქავთარაშვილებთან დიალოგზე, უარს აცხადებენ.

შეგახსენებთ, რომ შმაგი მუთოშვილი პოლიციამ 18 სექტემბერს დააკავეს.

გამოძიება მას სისხლის სამართლის კოდექსის 19, 109- და 236- ე მუხლით გათვალისწინებული დანაშაულის ჩადენას ედავება, რაც, ბრალდების მხარის მტკიცებით,  2020 წლის 29 ივლისს, დაპირისპირებული გვარის წარმომადგენლის, მურად ქავთარაშვილის სახლის დაცხრილვაში გამოიხატა.

შმაგი მუთოშვილს ბრალი დღეს, ოფიციალაურად, რუსთავის წინასწარი დაკავების იზოლატორში წაუყენეს, რის შემდეგაც, თელავის რაიონულმა სასამართლომა მას წინასწარი პატიმრობა შეუფარდა.

ავტორი – ხათუნა გულიაშვილი