სომხეთში განვითარებულ მოვლენებს მოსკოვი შეშფოთებით აკვირდება,- ამის შესახებ რუსეთის პრეზიდენტის პრესსპიკერმა, დიმიტრი პესკოვმა განაცხადა.
ინფორმაციას რუსული მედია ავრცელებს.
„შეშფოთებით ვაკვირდებით სომხეთში ვითარების განვითარებას. ჩვენ ამას სომხეთის, როგორც კავკასიაში ჩვენი ძალიან მნიშვნელოვანი და ახლო მოკავშირის, შიდა საქმედ მივიჩნევთ“, – აღნიშნა პესკოვმა.
შეგახსენებთ, რომ სომხეთის პრემიერ-მინისტრმა ნიკოლ ფაშინიანმათანამდებობიდან გაათავისუფლა სომხეთის შეიარაღებული ძალების გენერალური შტაბის უფროსი ონიკ გასპარიანი, რომელმაც მანამდე მისი გადადგომა მოითხოვა.
ნიკოლ ფაშინიანმა განაცხადა, რომ ქვეყნის შეიარაღებული ძალების გენერალური შტაბის მოთხოვნა მისი გადადგომის შესახებ სამხედრო გადატრიალების მცდელობაა.
შეიარაღებული ძალების გენერალური შტაბის მიერ გაკეთებულ განცხადებაში ნათქვამია, რომ მთავრობას არ შეუძლია, მიიღოს ადეკვატური გადაწყვეტილებები ხალხისთვის კრიზისულ ვითარებაში.
მოგვიანებით სომხეთის პრემიერ-მინისტრი ნიკოლ ფაშინიანი რესპუბლიკის მოედანზე შეკრებილ მხარდამჭერებთან მივიდა და მსვლელობაში მიიღო მონაწილეობა.
მსვლელობის პარალელურად, ოპოზიციურმა ძალამ “მოძრაობა სამშობლოს გადასარჩენად“ მოქალაქეებს მოუწოდა, 15:00 საათისთვის თავისუფლების მოედანზე შეიკრიბონ და სომხეთის შეიარაღებულ ძალებს მხარდაჭერა გამოუცხადონ.
ერევანში ამ დროისთვის შედარებით მშვიდი ვითარებაა. ნიკოლ ფაშინიანის მოწყობილი აქცია დასრულდა და პრემიერმა თავის მომხრეებს სახლებში წასვლისკენ, ხოლო ოპოზიციას მოლაპარაკებისკენ მოუწოდა.
