აშშ-ის ალერგიისა და ინფექციური დაავადებების ეროვნული ინსტიტუტის დირექტორის, ექიმი ენტონი ფაუჩის თქმით, WHO-ს განცხადება ასიმპტომური პაციენტებისგან ვირუსის ნაკლებად გავრცელების შესახებ, არასწორია. ინფორმაციას ამის შესახებ CNBC-ი ავრცელებს.
„არსებული მტკიცებულებების მიხედვით, კორონავირუსით ინფიცირებულთა 25-45%-ი ასიმპტომურია. თუმცა, ეპიდემიოლოგიური კვლევებიდან ჩვენ ვიცით, რომ ისინი შეიძლება, ვირუსის გადამტანები გახდნენ მაშინაც, თუ ასიმპტომურები არიან“,- ამბობს ფაუჩი.
ჯანდაცვის მსოფლიო ორგანიზაციამ თავიანთი განცხადების განმარტების მიზნით, დამატებითი კომენტარი გააკეთა. კერძოდ, როგორც ორგანიზაციაში აცხადებენ, ასიმპტომური შემთხვევები მაინც შეიძლება იყოს ვირუსის გავრცელების მიზეზი.
ენტონი ფაუჩი აცხადებს, რომ ჯანდაცვის მსოფლიო ორგანიზაციამ მტკიცებულებების არქონის გამო უკან დაიხია.
შეგახსენებთ, რომ ჯანდაცვის მსოფლიო ორგანიზაციაში რამდენიმე დღის წინ განაცხადეს, რომ ასიმპტომური შემთხვევებით კორონავირუსი შედარებით იშვიათად ვრცელდება.
აშშ-ის მთავარი ეპიდემიოლოგის თქმით, კორონავირუსი მისი ყველაზე საშინელი ღამის კოშმარია.
